Abdul Aziz patut mansik isu entara MPP, pedagang di Kpg Bumbok
KUCHING: Tuduh dipansutka Pemesai Khas Kaban Parlimen ( MP) Kuching Chong Chieng Jen, Abdul Aziz Isa lebuh madahka Majlis Perbandaran Padawan (MPP) enda ibuhka pedagang Bidayuh di Kampung Bumbok, semina mantaika diri enda tepegaika pengawa politik sereta enda tuai runding.
Chairman MPP, ke mega Kaban Kunsil Nengeri (ADUN) Batu Kitang, Lo Khere Chiang madah, Aziz patut dulu agi berandau enggau Ketuai Genturung Pendiau ngambika iya ulih mereti nyemetak agi pekara ti nyadi entara kededua piak.
Ku iya nerang, Aziz mega patut nguji mai kededua piak berandau memanah lalu ukai nya sengaja ngasut sereta ngasuh bala pedagang charut.
“Enti sema Aziz endang lurus ati sereta siruka penusah ditapi bala pedaja, iya enda patut ngasuh sida saru penemu baka nya ti tau ngasuh bansa pambar.
“Pemutar ti manah agi enggau ngemai kededua piak pedaja ngambika bekerejasama sereta setuju nyapai sempekat begulai nangkup peminta pangan diri,” ku iya ba sebengkah penerang, kemari.
Ku Lo, MPP suah udah ngatur randau begulai enggau bala pedaja, sekalika di balai tumpuk pendiau, di palan bejada nya empu, enggau mega di renggat kaunsil.
Ku iya, sida udah bela setujuka kesemua piak ngelala pengawa ti patut dipejalai dikena ngangkatka agi rampa palan bedaja baru nya, nangkup peminta enggau pengelantang bala pedaja enggau pelanggan.
Tu nyengkaum bekal ele- kterik enggau ai, nambahka penerang dalam balai, dipayung ari panchar mata panas, papan pemadah, enggau mega sebuah stor kontena ungkup bala bedaja naruh kesemua barang berega sida, ku iya seraya nambah, tebal agi bala pedaja besetuju mindah ngagai palan bedaja baru nya.
Taja pia, sedarka pekara bisi sekeda bala pedaja meruan enggai mindah sereta keran deka ngetanka palan bedaja lama, ku Lo, pengawa mindah ngagai endur baru iya nya pemutus kolektif ti digaga MPP pengudah berundingka penemu enggau penyarut ari kededua piak pedaja nya empu.
Nyema kesemua sida ulih bekerejasama enggau bedagang ba palan bedaja baru digaga nya, tu deka bisi ngadaka peluang dagang ungkup semua orang, tandu iya.
“Patut ke enda MPP deka melanja nyauka RM1 juta dikena ngemanahka jalai alun, entali ai enggau ngaga bangsal bedaja baru ti disikap enggau endur paking kerita khas sereta simpang jalai ngagai Kpg Bumbok, enti amat niat kami deka nyeliahka tauka enda ibuhka enggau ngenusahka peranak dia?” ku iya.
Seraya ngansak Aziz ngambika lebih komited, ku Lo, bisi tanggungpengawa ukai semina dipeda ari ulah aja, tang mega nengah adap bejaku enggau basa.
“Bekenaka jaku ti enda badas sereta nadai adap tau ngerusak gaya ulah enggau penyiru komuniti kitai, kelebih agi ngagai bala nembiak ti deka nyadi ketuai dudi hari.
“Nya alai, kena jaku ti manah enggau penuh tanggungpengawa,” tandu iya nyemetak.