Long San nyadi palan mansik sambung internet di menua ulu
KUCHING: Kandang menua Long San di sitak Telang Usan, Miri udah dipilih pakar Silicone Valley iya nya kompeni ari Amerika Syarikat (U.S)dikena nyadika palan pemansik sambung internet di kandang menua ulu.
Kaban Kunsil Nengeri (ADUN) Telang Usan Dennis Ngau madah, iya meri besai terima kasih ngagai Kepala Menteri Datuk Amar Abang Johari Tun Openg ke udah nyadang Long San, kelebih agi di Sekula Sekondari (SMK) Temenggong Datuk Lawai Jau nyadi endur ngaga pansik nya.
“Kami meri besai terima kasih ngagai Kepala Menteri ke udah milih Long San, laban tu mega inisiatif ari iya. Lebuh iya bejaku di Long San, Abang Jo sigi bisi kaul ti manah ba Long San, laban niang Temenggong Datuk Lawai Jau maya agi ba kabinet nengeri endang bekerejasama enggau niang Tun Openg ke maya nya nyadi Gabenor Sarawak. Nya kebuah iya deka ngemansangka Long San.
“Juluk Kepala Menteri ti endang ngemeratka teknologi digital, lalu milih Long San nyadi palan endur ngaga pansik. Ku iya, enti sambung internet di Long San mujur, reti nya sambung internet ba serata nengeri Sarawak pan ulih mujur, laban Long San jauh di kandang menua ulu ti dikelingi bukit,” ku iya, lalu nandu baru madahka komuniti Orang Ulu ke diau di sitak nya pan ransing ati meda projek tu deka digaga.
Nyema projek nya mujur di Long San, iya deka meri penguntung ngagai urung 20 buah rumah panjai sereta beribu rayat di kandang menua nya.
“Naka kediatu, lebuh dipasang tiang, iya enda entu berapa endar laban sitak nya ke bebukit. Nya alai pemisi teknologi baru tu ila iya nya ngena ‘ Satellite Balloon’ penyambung internet nya ba tikas ke tinggi agi, lalu ngarapka arus nya pan laju,” ku iya.
Maya nemuai ngagai Long San bedau lama tu tadi, Abang Johari madahka ‘Satellite Balloon’ nyangka deka dikena di kandang menua ulu dikena ngemanahka agi penyambung internet di serata menua tu.
Pemisi ‘Satellite Balloon’ nya ku iya, deka ngulihka spektrum ke ulih mungkur kandang endur ti tinggi ke enda ulih dibungkur menara telekomunikasyen laban ditekul bukit.
Ku Abang Johari, Long San nyadi palan dikena mansik dulu, lalu nyema mujur, sitak nya nyadi pemungkal teknologi nya di menua tu.
Projek tu iya nya kerejamsama entara perintah nengeri enggau sebuah kompeni ari Silicon Valley, US.