YOUSA mantu peranak Long Aton ke tasah angus
MIRI: Serakup Raban Nembiak Orang Ulu Sarawak (YOUSA) kemari bisi nyuaka bantu gari ngagai orang ke tasah angus di Long Aton, Tinjar, Baram, ke alai 22 pintu bilik rumah panjai dituntung penusah angus kena 16 Ogos nyin tadi.
Nitih ku Protem Presiden YOUSA, Spanski Steven, lima iku ari kaban sida nyengkaum iya empu ngatur pejalai ari Miri ke Long Aton nyuaka bantu gari ngagai ketuai genturung pendiau nya, Michael Kebing.
“Kami ngarapka bantu mit ari raban nembiak Orang Ulu mantu peranak dia bisi gari dikena pengudah rumah sida angus diempa api,” ku Spanski.
Ku Spanski, pemeri gari digumpul ari ruang bilik bala kaban serakup enggau bala bakih, lalu sida ngelaluka mayuh agi bantu enggau pemeri ari mensia mayuh ke alai YOUSA deka ngagihka iya ngagai sida ke tasah.
Ku iya, Kaban Kunsil Nengeri ( ADUN) Telang Usan Dennis Ngau nyukung pengawa dipejalai raban nembiak ti mantu komuniti di Ulu Baram.
Ku iya, Dennis meransang mayuh agi raban nembiak nitihka singkang sida lalu enti ulih nyereta nyadi kaban YOUSA di Miri ditu.
“YOUSA ukai semina fokus ngaga aktiviti nembiak aja tang mega pengawa rama, pengelantang enggau pelajar raban nembiak Orang Ulu,” ku iya nerang silik.
Diatu ku iya, YOUSA bejalaika pengawa ngiga orang nyadi kaban sereta raban nembiak ari komuniti Orang Ulu tau ngerejista diri empu enggau serakup nya ngambika sida bisi pelasar endur mantaika penemu, buah runding sereta mega meri perambu manah agi ungkup komuniti.
Ku iya, aktiviti ‘online’ YOUSA ke bukai deka ngatur Forum Nembiak Orang Ulu, ngelancharka album OUI berambaika jaku siti sada, pengerami makai lemai seiti sada raban nembiak Orang Ulu enggau program CXM 2017 ti deka diatur di Bintang Mega Mall Miri kena 4 enggau 5 November.