Beri sukung ngagai Anyi Ngau maya PRU14, ku Tiong King Sing
BINTULU: Bala kaban Serakup Bansa Kenyah Sarawak udah nemuai meri basa ngagai Kaban Parlimen (MP) Bintulu, Datuk Seri Tiong King Sing ba Palan Servis Rayat iya.
Seraya mantaika sukung sida ngagai bala ketuai tetinggi Parti Demokratik Progresif (PDP), penemuai nya mega deka nanya ngagai Tiong sekalika bisi runding deka ngetanka penyandang ungkup sitak Baram, Anyi Ngau nyadi chalun maya Pengawa Bepilih Besai Ke-14 (PRU14) ti deka datai.
Raban nya datai ari bala kaban serakup, raban nembiak enggau ketuai indu PDP Telang Usan nyengkaum baka kaban exco iya, bala ketuai raban bansa di Baram ti diketuaika chairman serakup nya, ke mega Kaban Kunsil Nengeri (ADUN) Murum, Kennedy Chukpai Ugon.
Dalam jaku dipansutka iya, ngarika serakup nya Chukpai mantaika pengaga enggau temegah ati ngagai komitmen enggau penyiru Tiong ba pekara pengelantang peranak menua nya.
Iya mega mantaika sukung nadai bebagi ngagai ketuai dipegai Tiong ke nyadi presiden PDP lalu ngarapka Tiong deka berunding terus ngirai Anyi Ngau nyadi chalun ungkup P.220 Baram baka ti dipinta peranak di sitak nya.
Peminta nya ku iya belalauka penyulut pengawa digaga MP Baram ngenataika servis ngagai rayat di kandang menua nya.
“Lebuhka gawa nyadi MP Baram, iya (Anyi), udah naka ulih gawa mantu mutarka isu ditapi peranak menua nya,” ku iya. Chukpai mega nyamin Tiong anang irauka penyakal di Baram laban iya (Chukpai) madahka sida nya enda ker- ing dibanding enggau Barisan Nasional (BN).
Tiong Presiden PDP madahka iya udah berandauka pekara nya enggau bala ketuai tetinggi BN renggat perintah besai enggau perintah nengeri nyengkaum Kaunsil Besai PDP sereta udah setuju ngetanka Anyi bediri minta pilih di Baram maya PRU14 tu.
Taja pia, iya enda ngenggaika bisi nerima jaku nyakal ngirai baru Anyi ari sekeda piak sebedau tu, tang nyentuk ke diatu semina seiti aja nama udah dianjung ngagai bala ketuai tetinggi.
Berebak enggau nya, Tiong minta kaban Serakup Bansa Kenyah sarawak kelebih agi PDP Telang Usan enggau Baram meri kerejasama enggau sukung ngagai MP Baram, Anyi Ngau, maya PRU14 enggau menang majoriti besai.