Komuniti Orang Ulu sebagi ari komuniti Dayak
Taja pan sida magi diri ngena pupu bansa sub-etnik Orang Ulu, tang sida ngumbai diri komuniti Dayak
KUCHING: Orang Ulu tetap sebagi ari komuniti Dayak taja pan sida magi diri ngena pupu bansa subetnik Orang Ulu, ke alai sida ngumbai diri komuniti Dayak.
Kaban Kunsil Nengeri (ADUN) Telang Usan, Dennis Ngau madah enti bisi orang ngumbai Orang Ulu tu ukai Dayak, nya jaku selebubu, sengapa sereta enda bebatang.
“Enti bisi orang ke ngumbai kami ukai Dayak, nya jaku ke enda betul, enda bebatang.
“Aku ngarapka pekara ke baka tu enda nyadi penanggul, penyarut laban kitai beratika penemu sereta runding ke besai agi ari nya. Nya kebuah Sarawak tu nyelai, laban kitai ngembuan mayuh macham pupu raban bansa sereta pengarap, ke ulih diau enggau lantang enggau pangan diri ari kelia menya,” ku iya.
Dennis ti mega nyadi Sapit Sekretari Besai SABERKAS (Gerempung Serakup Nembiak Kebangsaan Sarawak) madah munyi nya pengudah aum exco SABERKAS ke nyambut Penumbuh ke-50 (Golden Jubilee) di sebuah hotel ditu, kemari.
Iya mega nimbal bekait enggau sentimen sekeda orang ke bemain enggau pekara bekaul enggau bansa enggau pengarap, ke mayuh dibantaika ba media rama kelebih agi ba pekara nuduh bagi pangku pengawa ungkup Dayak ba kompeni ke diempu nengeri Sarawak.
“Kitai enggaika penyarut pasal bansa enggau pengarap nyadi di Sarawak laban kitai nadai ngembuan ulah baka nya ke mida sesiku orang. Kitai tu semua orang Sarawak, taja pan bida ari bansa sereta pengarap.
“Nya alai, sekali agi aku nyebut, Orang Ulu agi ari baruh kategori Dayak, taja pan ari etnik ke mit, tang kami Dayak, lalu kami berasai temegah ati nyadi Dayak lalu diterima tetiap pupu bansa bukai di Sarawak,” ku iya.
Di Sarawak, semilan komuniti Orang Ulu ke pemadu besai, iya nya Kayan, Kenyah, Kelabit, Penan, Saban, Bisaya, Lun Bawang enggau Berawan, tang ari baruh nya, bisi etnik mit bukai baka kenyah, sida bisi etnik Lepo Agak, lalu baka nya mega enggau Kayan, Penan sereta etnik bukai, ku iya.
Nya alai ku iya, sekeda orang ke nguji nyerara Dayak enggau Orang Ulu, siti pengawa ke enda betul ti tau mai penyarut ngagai nengeri tu.
“Laban kami taja pan temegah ati enggau etnik besai tauka etnik mit kami, kami ari baruh gempung besai Dayak lalu kami enggai diserara,” ku iya.
Nya alai, sekali agi aku nyebut, Orang Ulu agi ari baruh kategori Dayak, taja pan ari etnik ke mit, tang kami Dayak, lalu kami berasai temegah ati nyadi Dayak lalu diterima tetiap pupu bansa bukai di Sarawak. Dennis Ngau Kaban Kunsil Nengeri Telang Usan