Restoren nyual pemakai tasik, rumah enggau bilik suwa angus di Miri
MIRI: Sebuah restoren nyual pemakai tasik, rumah enggau bilik suwa di Jalai Miri-Pujut (di kaki Bukit Kanada) kena tuntung penusah angus urung pukul 11.30 pagi kemari.
Api besai enggau sebun datai ari endur penusah nyadi ngasuh beratus iku ngena entukar mansa endur nya begau.
Santi Ukok, 32 taun, ti nyuwa dapur nyadi bilik suwa besepiak enggau restoren pemakai tasik lebuhka dikerandau kemari, madahka iya benung belelak di bilik meda tv lebuh ninga bunyi inggar endar meletup.
“Aku di rumah enggau dua iku anak indu aku, beumur empat taun enggau setaun, lalu dua iku anak ke bukai, beumur 13 taun enggau lapan taun di sekula.
“Ngenyit, aku ninga bunyi inggar enggau utai meletup. Aku nyangka bisi charut di luar rumah tang lebuh agi meresa, aku tekenyit meda sebun asap enggau api nyerarai jampat endar,” ku iya enggau sesabak.
Santi indai tunggal, lalu jampat mulaika diri ngagai bilik lalu ngambi dua iku anak iya ti benung tinduk jam nya.
Iya mega mujur nyengkau sekeda dokumen beguna enggau gari sebedau lari ninggalka rumah.
Dua iku kaban belayan Santi ti bela diau begulai enggau iya tang seduai nya nadai di rumah lebuh penusah nya nya di.
Berebak enggau nya, tim ari 11 iku kaban ari Opis Pengerara Api enggau Penyah Penusah (Bomba) Miri, semina 2 km ari endur penusah nyadi, ngesah penusah pengudah nerima kangau ngenyit urung pukul 11.37 pagi.
Tim nya datai ba penudah nyadi urung pukul 11.39 lalu terus ngeluarka perengka pengerara api.
Tim dua iku ari Bomba Lopeng Miri mega bisi ngesah penusah sereta meri bantu ngagai tim keterubah.
Operasyen tembu urung pukul 1.20 ngalih hari.
Rumah enggau bilik suwa angus lengis tang restoren nya 90 peratus angus.
Nadai penusah bebadi nyawa bisi diripot nyadi dalam penusah nya.
Pun penusah nyadi enggau penyampau pengerugi agi dipansik.