Nembiak iya nya modal mensia ke pemansang menua
Apai indai, pengajar patut begulai ngambika juluk nempa modal mensia ti menyana ulih dijapai
MIRI: Nembiak iya nya modal mensia ti pemadu berega dikena nentuka pemansang menua tu terus dijapai.
Berindik ari nya ku iya, apai indai enggau pengajar patut gawa begulai nentuka bala nembiak tu ba pelasar ti betul nyapai pemujur dalam akademik.
“Aku mega meransang bala pengajar bela meri fokus ngagai nembiak ti kurang dalam pelajar ngambika sida teulihka pemutus nyulut sama baka ke bukai,” ku Kaban Parlimen (MP) Sibuti, Ahmad Lai Bujang rambau Pengawa Nyuaka Pemeri Kit UPSR 2017 di Sekula Primari (SK) Temenggong Datuk Muip kemari.
Beserimbai enggau nya, nembiak ti bulih pemutus nyulut dalam peresa perin- tah di sitak Parlimen Sibuti deka nerima insentif setipak enggau penyapai akademik sida.
Ku iya madah, nya nyadi peransang enggau ngenang pemanah pengawa ngagai bala nembiak ngambika sida terus fokus sereta bulih pemutus ti nyulut dalam peresa.
“Aku besemaya sida ti bulih pemutus nyulut deka nerima insentif setipak enggau penyulut sida dalam peresa perintah ila,” ku iya
Ahmad Lai dekaka nembiak ti napi Ujian Peperiksaan Sekolah Rendah (UPSR) sekula menua pesisir dalam parlimen nya ngambika pas 70 peratus tauka bulih A.
“Nembiak nyadi modal mensia ti patut diberi pelajar menyana lalu tentu apai indai ngarapka bala anak sida mega bulih pemutus nyulut dalam UPSR,” ku iya.
Ba lansa ke sama, bala nembiak ti napi UPSR mega dilalau ngambi bebasaka apai indai enggau pengajar ngambika sida bulih berekat enggau ati lantang.
Bisi 1,121 KIT UPSR udah diagih ngagai nembiak di 42 buah sekula di baruh Parlimen Sibuti.
Ba lansa ke bukai, iya mega nerangka perintah bela mantu bala pengajar ti gawa jauh ari pangan diri ketegal nitihka pengawa.
Opis Menteri Pelajar Malay- sia ku iya diatu benung mantu pengajar ti gawa jauh ari pangan diri ngambika sida lantang ati baru bejalaika pengawa begulai enggau pangan diri.
“Taja sida tu enda ngajar di sekula ke sama, tang pengawa dipejalaika perintah mantu sida tu ulih mutarka penanggul ditapi pengajar ti tusah ati,” ku iya.
Sama bisi datai Kepala Pengajar SK Temenggung Datuk Muip, Hamisah Sherbini, pengari Pemesai Pelajar Pelilih Miri, Atini Anwar enggau Sekretari Politik Kepala Menteri, Julani Mokhtar.
Aku mega meransang bala pengajar bela meri focus ngagai nembiak ti kurang dalam pelajar ngambika sida teulihka pemutus nyulut sama baka ke bukai. Ahmad Lai Bujang MP Sibuti