UPP pechaya peranak di Lanang deka meri sukung tegut ke BN
SIBU: Parti Rakyat Bersatu (UPP) andal mensia mayuh meri sukung ti tegut ngagai Andrew Ting ke ngarika Barisan Nasional (BN) ti deka bepilih ba Parlimen Lanang maya Pengawa Bepilih Besai (PRU) ti deka datai.
Nitihka pansik ari Tim UPP Lanang maya ke nemuai ngagai rumah panjai empai lama, peranak rumah panjai lantang ati bela besepenemu enda belampung ati nyukung Ting nyadi chalun UPP.
Sukung sida tu mega bepun enggau gaya maya diatu alai Ting dipeda ba jalai ti engkeman begulai enggau Kaban Kunsil Nengeri ( ADUN) Dudong Datuk Tiong Thai King kelimpah seiku agi chalun parti tu iya nya, Andrew Wong ke dipadu nyadi chalun ulih menang bediri ba Parlimen Sibu.
Nengah perati tim nya mega, rayat tebal agi ngembuan penemu madahka semina pengari rayat BN aja ulih nyaup ngangkatka pengidup sida nengah pemansang ke digaga.
Bekaul enggau Pelin Sibu 1.0, ba sida, taja agi diau di rumah panjai tang mayuh anak sida tauka rebak baru diau di mengeri Sibu nyengkaum iya ke agi besekula.
“Pelin Sibu 1.0 ti ditumbuhka UPP tu nyadi batang jalai dikena mai pemansang ngagai semua tikas bansa ditu.
“Reti iya, pelin tu digaga laban ngira semua rayat baikka ba mengeri tauka ba menua pesisir,” pia ku sekeda ari penemu mensia mayuh maya nya.
Sida madah, pemansang ke udah dibai BN ngelama tu endang dipeda sereta mujur mai pengelantang ngagai rayat.
Tu nyengkaum baka maya pengari rayat BN ngungkupka agih dikena ngaduka pemansang jalai alun nyengkaum di menua pesisir kelimpah di mengeri ti ditumbuhka enggau Palan Transformasyen Mengeri Sibu.
“Nya alai, kitai andal amat Ting enggau Wong dipilih nyadi chalun BN maya PRU tu ngambika program pemansang baka Pelin Sibu 1.0 mujur dipenyadika.
“Seduai udah nyengala dipeda orang ti regas, siru sereta enda lembau begulai enggau rayat.
“Kami pechaya seduai deka dipilih nyadi chalun BN lalu mujur ba PRU sebedau seduai bejalaika pengawa mai pemansang ngagai kami.
Ari sukung ke diayan mensia mayuh tu mandangka dua iku chalun tu nadai bepenanggul betapi enggau penyakal nyengkaum Ting endang diandalka ulih ngambi penuduk Parlimen Lanang ari penyakal.