Besaup bejalaika pansik Teknologi Gadung
Ngambika juluk dekaka Sarawak nyadi nengeri Teknologi Gadung ulih dikemujur, ku Dr Rundi
KUCHING: Pemansik ejensi perintah enggau peribit, diperansang besaup bejalaika pansik ngambika juluk dekaka Sarawak nyadi nengeri Teknologi Gadung ulih dikemujur.
Menteri Utiliti Datuk Dr. Stephen Rundi anak Utom madah, nengah pengelandik ari tetiap renggat komuniti, mayuh agi raban bukai ulih meri penemu, pengelandik, teknologi baru sereta belanja dikena mantu peranak Sarawak di ulu sungai tauka di menua pesisir ngambika ulih disambung elekterik lalu bepeluang ngasaika pelajar baka nembiak ba menua bukai.
“Tagit Teknologi Gadung mega deka meransang sekeda sektor ke bekaul bekerjasama sereta regas ngiga chara ngenegapka kuasa lalu ngelakuka guna nya ngagai mensia mayuh.
Di Malaysia, agi mayuh kandang menua pesisir ke bedau disambung bekal elekterik sereta jalai alun ke manah, ku iya.
“Ba sekeda menua pesisir tauka di ulu sungai kelebih agi di Sarawak, penanggul ke ditapi perintah nyambung bekal ai beresi, elektrik enggau infrastruktur iya nya gaya tanah tauka rampa menua ke enda engkeman.
“Taja pia, kitai beterima kasih laban Sarawak tu mayuh sungai. Nengah kerejasama ari Opis Menteri Kuasa, Teknologi Gadung & Ai (KETTHA) enggau Palan Kuasa Ulih Dikena Baru (CREN), UNIMAS sereta komuniti ke diau di ulu sungai tauka menua pesisir deka bisi kuasa karan nengah sistem mikro hidro ke ulih mekal kuasa karan.
“Sistem kuasa solar mega dikelala nyadi pemekal kuasa ke bisi peluang dikemansangka nyadi kuasa alternatif di Sarawak, kelebih agi di kandang endur ti diperatika enda ulih digaga sistem mikro hidro,” ku Dr. Rundi.
Iya madah munyi nya nengah teks jaku iya ti di bacha Sekretari Mendam opis menteri nya, Dato Ir. Alice Jawan ba Licha pasal Kuasa Ulih Di Kena Baru, ti diatur KETTHA, UNIMAS enggau CREN di sebuah hotel ditu, kemari.
Licha tu sebagi ari inisiatif CREN sereta pengawa ngangkat sereta ngemujur kuasa ke ulih dikena baru, ba komuniti.
Ku iya baru, penemu komuniti bekaul kuasa sereta teknologi ke bekaul enggau kuasa beguna amat ngambika sida nemu sereta meretika pemujur kuasa ke ulih dikena baru.
Ku iya, pengawa bejadika Teknologi Gadung Menua kena 24 Julai 2009 suba, mandangka pemendar perintah deka nentuka teknologi gadung nyadi pengerembai pemansang ekonomi lalu nempa Malaysia nyadi hub teknologi gadung.
“Ukai semina nya aja, Langgur Malaysia Lumpar ke-11 mega madahka ngena kuasa ke ulih dikena baru nyadi siti singkang ngelimat penyampau kuasa ke dikena ti datai ari pemisi rampa menua.
Ambika chunto, kerejasama ari ejensi perintah enggau peribit sereta pemansik ari IPT dalam enggau menua tasik ulih mai Malaysia nyingkang nuju pemujur teknologi gadung ke nyulut agi,” ku iya.
Sebedau nya, dalam teks jaku Mandal Canselor UNIMAS, Prof Dato’ Dr. Mohamad Kadim Suaidi ti dibacha Sapit Mandal Canselor UNIMAS, Prof Madya Wan Ibrahim Wan Hashimngarapka mayuh agi program ke baka tu ulih dipejalaika raban pemansik enggau raban akademik, jemah ila.
Nya nyengkaum bejalaika mayuh macham pansik bekaul enggau rampa menua sereta mungkur projek bepelasarka komuniti, nyengaum Pansik enggau Pemansang (R&D) produk sereta teknologi ke ulih dikomersial.
Ku iya baru, komuniti Bario baka di Lio Mato, Kpg Assum, enggau Punan Trusan nyengkaum sekeda palan bukai teulihka penguntung ari pemujur pemansang sistem mikro hidro.
“CREN udah mujur bulih sekeda geran pansik enggau pemansang ke projek bepelasarka teknologi gadung. Siti ari projek ke diberi iya nya projek ‘Green Energy Island’, ke ngiga kandang menua pesisir ti tu dikemansang nengah sistem mikro hidro.
“Ari 200 kandang menua ke dikelala, 10 udah diendur bejalaika pansik ‘feasibility study’ lalu ari asil nya, semina tiga aja ke bisi peluang besai dikemansang, iya nya Lio Mato, Kpg Assum enggau Punan Trusan,” ku iya.
Sama bisi ngulu atur pengawa nya kemari, chairman Malaysian Standards for PV Working Grouup, Prof Madya Dr. Sulaiman Shaari, Dekan Fakulti Injiniring, UNIMAS, Prof Ir Dr. Al-Khalid Othman, Direktor Palan Kuasa Ulih Dikena Baru, UNIMAS, Prof Madya Dr. Azhaili Baharun.
Urung 200 iku ngulu licha ke diatur pengelama dua hari nya.
Bala pesereta nya ari Opis Pelilih Menua, pengari komuniti, pengelicha, nembiak sekula, guru pengiring ari sekula enggau IPT di Bandaraya Kuching.
Tagit Teknologi Gadung mega deka meransang sekeda sektor ke bekaul bekerjasama sereta regas ngiga chara ngenegapka kuasa lalu ngelakuka guna nya ngagai mensia mayuh.