Insentif Pelajar Larry Sng KCROA dikena ngangkatka tikas pelajar
KAPIT: Ex-Kaban Kunsil Nengeri (ADUN) Pelagus Larry Sng Wei Shien madah taja iya nadai agi dalam politik, tang iya deka terus gawa nengah sebarang chara ti ulih digaga iya kelebih agi ba pengawa ngangkatka pemanah tikas pelajar.
“Taja aku nadai agi dalam politik, aku deka terus gawa ba sebarang pengawa ti ulih digaga aku, kelebih agi ba pengawa ngangkatka pemanah tikas pelajar ngagai bala nembiak.
“Pelajar tu kunchi ngagai pengidup dudi hari. Kelimpah ari Insentif Pelajar Larry Sng ungkup pelajar tinggi, aku deka meri belanja ngagai Serakup Pengempu Restauran enggau Pak Kupi Kapit (KCROA) dikena meransang bala anak sida nyulut dalam pelajar sekula,” ku Larry madah lebuh pengawa bejadika Insentif Pelajar Larry Sng KCROA ti diatur di bilik aum besai KCROA, Jalai Penghulu Nyanggau ditu, kena lemai Hari Dua tu tadi.
“Aku beratika dalam komuniti tu, nyenggala endar kitai dibagi nitihka peturun diri ( Foochow, Hockien tauka Kwang Tung).
“Kitai diatu patut ngubah runding ngambika gawa begulai beserakup dalam komuniti China.
“Pengawa bebagi tu ngasuh kitai lemai, ari ke kitai ulih ngempung pengering dalam penyerakup sereta ngemai pemaik ngagai semua komuniti.
“Pekara pemadu beguna kitai mesereta ngintu sereta ngemeranka daya pengidup enggau adat kitai laban tu kelai bansa kitai.
“Aku temegah ati meda KCROA datai ari semua peturun bansa China begulai. Tu ngayanka kebuah aku ngungkupka pemeri pelajar laban iya deka nguntungka semua nembiak ti nyulut,” ku iya nerang silik.
“Nadai ngira pangku pengawa kita, nadai tinggi tauka baruh. Pekara ti beguna, lurus ati enggau bebasa ngagai pangku pengawa nya. Sapa kita, tentuka gawa memanah,” ku iya nambah.
Lebuh ngelansa pasal pekara pemansang, ku Larry, enda lama da agi Kapit deka disambung negna jalai ngagai kandang menua ke bukai di nengeri tu, Jalai Kapit-SongKanowit.
“Tabi puji ngagai pengari rayat ti udah gawa. Nadai ngira parti politik, lebuh datai ba pekara pemansang Kapit, kitai semua meseti gawa begulai laban bejalaika pemansang infrastruktur enggau penyikap perengka guna pemun ditu ngemai pemaik ngagai semua,” ku iya.
Berebak enggau nya, iya bisi nyuaka pemeri penyampau RM5,000 ngagai KCROA ungkup aktiviti rama.
Iya mega nyuaka insentif pelajar ngagai 23 iku nembiak nyulut ba sekula enggau pemutus peresa perintah 2016.
Nembiak ke belajar ba Primari Satu ngagai Primari Lima bela nerima RM60, UPSR RM100, PT3 RM130, SPM RM150, Matrikulasyen RM180 lalu bala Graduet RM200.
Sama bisi bejaku Chairman Pengatur, Tiong Hin Hoo ke mega Chairman Serakup enggau Ngatur Pekara Pelajar Nembiak Ma Tian Ho.
Chairlady Gerempung Serakup China Sng Geok Yien, Penyanding Penemu Dato Yong Hua Sying, Liew Song Swee, Kong Chin Hua sekeda ari beratus bala ke bisi datai ngulu pengawa sehari nya.