NREB ngungkupka RM8 juta dikena mansik sungai S’wak
Pengawa tu dikena nentuka batang sungai di nengeri tu beresi
KUCHING: Pe r int a h nengeri ngungkupka RM8 juta ngagai Opis Pengeraja Asal enggau Rampa Menua (NREB) dikena opis nya mansik kapasiti ti ngamahka enam sungai di Sarawak.
Kontroler NREB Peter Sawal madah, tu projek pemungkal ke nyengkaum Batang Kemena, Batang Sadong, Batang Oya, Batang Mukah, Batang Baram enggau Batang Lassa.
Iya madah batang tuju pansik tu iya nya dikena meri penemu sentang pemerat polisi ungkup sungai tu ngambika dipansik sereta mantaika strategi kena nyapai kualiti ke ditagit.
Strategi tu ku iya, deka mungkur kuasa undangundang ke terit, ngemanah sereta mansik baru atur ke bisi diatu, ngambika nadai aktiviti digaga ba palan pun ai di Sarawak.
“Ambika chunto, enti Sungai Tabuan (Sungai Sarawak Kiri) dipansik, NREB enda ngarapka nya digaga manah ngagai Kelas ‘A’ tang Kelas ‘ 2B’ nyangka ulih dijapai tang enti deka nyapai nya, atur tauka perambu enda tau enda bisi, kena beratika nadai aktiviti digaga di kandang menua nya,” ku iya madah ngagai Utusan Borneo kemari.
Lebuh bejuraika pekara nya, Peter madahka pansik nya deka sama digaga ngagai sungai bukai di serata menua tu, lalu ungkup timpuh ke panjai, NREB deka ngaga program, strategi ngemanah, merati sereta bejalaika atur kuasa undang-undang.
Bekaul enggau 18 buah sungai ke nyadi pemekal ai mata di nengeri tu lalu dipadah bisi kamah, Peter madah mayuh ari sungai di Sarawak agi ulih dikena nyadi pemun mata ai tang deka diubat dulu.
“Diatu NREB benung meratika kualiti ai ari 50 sungai besai di serata nengeri nengah Program Matau Kualiti Ai Sungai,” ku iya.
Kelimpah ari nya ku iya, sida ke ngaga pengawa berumah enda tau enda ngaga ‘Penilaian Impak Alam Sekitar’ tauka EIA ke semua bansa aktiviti ke di lis ari baruh Pengeraja Asal enggau Rampa Menua (pengawa ke udah ditetapka).
Nengah chara tu, ku iya, NREB ulih ngambi atur bejejaga lalu nyendiaka atur ngagai kunteriktor nitihka atur nya kena beratika empas pemansang ke digaga ulih dikurangka.
“Nengah konsultan ke dipilih, sida iya enda tau enda mantaika ripot beratika rampa menua urung tiga kali setahun (EMR) bekait enggau penuduk sida iya nitih atur ke ditetapka EIA enggau penuduk kualiti ai sungai enggau sitak pemansang sida iya,” ku iya.
Dalam Ripot Kepala Audit Menua (KAN) Siri 1 2016, bisi 18 sungai ke nyadi pemisi ai mata menua tu diperatika setengah kamah.
Berindik ari nya, Kepala Menteri Datuk Amar Abang Johari Tun Openg udah ngasuh ijinsi ke betanggungjawab di menua tu, ngambi atur ke patut, kena ngemanahka kualiti ai ari sitak endur nimbun ai di menua tu.
Iya nandu baru madahka, atur nya berat endar, kena beratika ai beresi ke disambung ngagai mensia mayuh ke diau di menua pesisir sereta ulu sungai.
Ambika chunto, enti Sungai Tabuan (Sungai Sarawak Kiri) dipansik, NREB enda ngarapka nya digaga manah ngagai Kelas ‘A’ tang Kelas ‘2B’ nyangka ulih dijapai tang enti deka nyapai nya, atur tauka perambu enda tau enda bisi, kena beratika nadai aktiviti digaga di kandang menua nya.