DPHI dikena ngenukuka produk inovasyen nembiak sekula

MIRI: Perbadanan Harta Intelek Malaysia (MyIPO) ngadaka ‘ Dana Pemfailan Harta Intelek’ (DPHI) ngagai bala nembiak sekula ti nempa produk inovasyen dikena ngulihka hak eksklusif.

Kaban Perbadanan MyIPO, Ahmad Lai Bujang madahka belanja nya ulih dikena melanja ungkus pengawa ngenukuka produk inovasyen sereta belanja servis ejen paten ti berejista.

“Kenyau ari belanja nya dilanchar ari baruh Program IP Summer Camp, 17 peminta paten udah ditukuka ngena belanja tu,” ku iya rambau Pengawa Bejadika IP Summer Camp di Sekula Sekondari (SM) Sains Miri kemari.

Kaban Parlimen (MP) Sibuti nya madahka piak sekula patut chakah agi bejalaika pengawa nganjung peminta reta intelek di MyIPO nengah Dana Pemfailan.

“Kebuah pia, nyema rekacipta nya udah dibantai ngagai mensia mayuh, iya badu agi dikumbai produk baru.

Berebak enggau nya iya tau ngachau pengulih direjista nyadi paten sereta muntang agi piak ketiga ngaga ubah enggau rejista nyadika nya hak sida,” ku iya nyemetak.

Ahmad Lai mai perati ke alai MyIPO nyediaka Portal ‘IP for Youngsters’ ngambika bala nembiak sekula mantaika asil produk inovasyen enggau kreativiti sida.

“Nengah portal nya, bala nembiak ulih ngerintaika produk inovasyen sida ngambika dijual lalu nyentukka diatu, bisi 60 produk udah dilis ba portal nya,” ku iya nerang.

Bisi 150 iku nembiak diau bemalam di sekula ( SBP) Zon Sabah, Sarawak enggau Labuan udah ngulu program IP Summer Camp renggat nasional nya.