Tiga batang pekara ari baruh KRA 5 deka dikemerat
Nyengkaum pengarap ari mensia mayuh pasal pengelikun, penyerakup enggau pengelantang raban bansa
KUCHING: Menteri Pengintu Pengelantang Pendiau, Pengelantang Raban Bansa, Orang Indu enggau Pemansang Nembiak Mit Datuk Fatimah Abdullah madahka udah ngelala tiga pekara ti pemadu beguna ke patut dikemeratka dalam Bidang Keberhasilan Utama (KRA) 5 ari baruh komponen pengelantang raban bansa.
Nitih ku iya, nya nyengkaum pengarap ari mensia mayuh pasal pengelikun, penyerakup enggau pengelantang raban bansa.
Fatimah madahka isu nya patut chakah ditapi dikena ngenukuka penyerakup di nengeri tu ulih terus dikemeran sereta dikemeratka.
“Pekara pengelantang raban bansa nyadi entara ke beguna besai dalam agenda transformasyen rama enggau Indeks Pengelantang Sosial Nengeri,” ku iya.
Fatimah mansutka pekara nya lebuh bejaku ba aum pengarang berita pengudah ‘Majlis Penyerahan Rasmi Bahagian Solidariti Unit Keselamatan Negeri’ (UKN) Opis Kepala Menteri ngagai opis menteri iya ditu,kemari.
Ngenang panjai pekara nya, iya madahka nengah komponen penyerakup nya, bisi beberapa pekara ti dikelala dikena ngangkatka penegap penyerakup.
Fatimah madahka nya mungkur raban bansa, orang seseiku, kurang penaluk, ekstremis enggau bepilih bansa enggau ke bukai.
“Tu entara pekara ti ditemu, ti deka dikemekuhka kitai enggau aspek tu dikena nyeliahka penyerekang peny- erakup.
“Kitai enggaika raban tu terus anyut dalam dunya sida empu sereta enda bekaul enggau raban bansa,” ku iya.
Nya alai, mayuh program deka dipejalaika dikena perintah nempa rega penyerakup dalam raban bansa sekula berengkah ari renggat baruh.
Fatimah madahka seiti chara iya nya program ti nagit penyereta ari rebak biak kelebih agi nembiak sekula enggau palan pelajar tinggi.
Berindik ari pekara nya, dua program ke diatur dulu nyengkaum Rancangan In- tegrasi Murid Untuk Perpaduan (RIMUP) - Sarawak Initiative dan Sayang Sarawak nengah pekit video enggau fotografi.
Nitihku iya, penyerakup berengkah ari raban biak ke lalu lebuh sida nyadi rebak dudi ila deka mai pemansang ngagai nengeri.
Sama bisi datai, Menteri Muda Pengelantang Raban Bansa, Datuk Francis Harden hollis, Sekretari Mendam Opis Menteri nya, Dr Saadiah Abdul Samat enggau Pegawai Tadbir Khas UKN Opis Kepala Menteri, Dato Clarence Rorote Sagon.
Pekara pengelantang raban bansa nyadi entara ke beguna besai dalam agenda transformasyen rama enggau Indeks Pengelantang Sosial Nengeri.