Mensia mayuh ditesau sampal masuk Pekit Gambar, Cherita Pandak
KUCHING: Mensia mayuh menua tu enda ngira bansa enggau jalai pengarap dipinta sama sampal masuk Pekit Gambar & Cherita Pandak ti mekuh ngagai Sarawak Multi Ethnic & Cultural Families.
Ketuai Sekretari Politik, Abdullah Saidol madahka pekit nya diatur Opis Sekretari Politik enggau kelab Penyukung Barisan Nasional Sarawak (BNBBC Sarawak) nyerumba Hari Malaysia 16 September 2017.
Iya madah, nya dikena ngayanka pengulih peranak menua tu begulai enggau lantang enda ngira bansa enggau mayuh jalai pengarap ulih diau begulai ari baruh seiti perabung.
“Penemu ngatur pekit tu dikena ngayanka mayuh ruang bilik peranak Sarawak ke ulih nerima, ngambu tauka ngiru, ulih nerima penemu orang bukai enggau ngayanka basa, ulih mereti sereta bisi penyelai baka bebasa mayuh jalai pengarap enggau etnik nengah ‘belaki tauka bebini champur’.
“Tuju pekit tu, dikena ngelaku tauka ngayanka enggau ngenegapka penyerakup, pengulih nerima penemu pangan diri enggau basa dalam raban bansa kitai ti enda ngira pupu bansa kelebih agi di Sarawak,” ku iya dalam aum pengarang berita pasal pekit nya ngarika opis sekretari politik enggau BNBBC Sarawak.
Bejaku baru, iya madahka dalam menua nuju pemansang, pekara ti bekaul enggau kaul mensia enda tau diambi mudah.
“Kitai ke nyadi peranak Sarawak enda tau enda netap sereta ngetanka tikas pechaya tauka pengarap ke nadai bechiping dalam pengidup ti penuh pemaik enggau pengelantang.
“Dalam kitai betapi enggau mayuh pemar tauka penguji, kitai deka tetap berakup dalam mayuh bengkah penyelai ,” ku iya seraya madahka BNBBC Sarawak bisi ngungkupka belanja RM10,000 ngagai pekit nya.
Bekaul enggau pekit nya, lumur satu deka mai pulai perais RM3,500, semalam bemalam ba Damai Beach Resort, seunit kamera, plak enggau pemeri, lalu lumur dua RM2,500, seunit kamera, plak enggau pemeri.
Nambahka nya lumur tiga deka bulih RM2,000, seunit kamera, plak enggau pemeri sereta orang ke bulih ba penuduk ke-4 enggau ke-5 deka bulih plak aja.
Pemekit enda tau enda ngajung dua iti gambar ruang bilik ti disempulang enggau cherita pandak sekalika ditulis dalam English tauka Bahasa Melayu enggau pemanjai 150 leka jaku pasal ruang bilik.
Lalu udah nya anjung penyereta nya ti udah ditulis nama penuh, lumur kad pengelala, lumur telefon enggau dua (2) iku referees ke nadai kaul enggau ruang bilik ngagai email: swkpolsecoff@gmail.com.
“Hari bulan kepenudi nganjung penyereta iya nya kena 16 September 2017 pukul 6 lemai. Pemutus deka dipadahka kena 23 September 2017 , lalu pengawa nyuaka perais diatur ba opis kepala menteri,” ku iya.
Penerang bekaul enggau pekit tu tau ditanya ngagai Fifi 019-3862681 enggau Hazel ba lum,ur 019- 8348678.
Sama bisi dalam aum pengarang berita nya kemari, Chairman BNBBC Sarawak Paulus Palu Gumbang sereta bala kaban BNBBC Sarawak enggau sekretari politik Sarawak ke bukai.