Perintah nengeri deka nentuka bansa Penan bisi dokumen pengelala
JPN sereta pengari rayat deka chakah mantu komuniti tu ngambika bisi ngembuan tingki enggau surat pengada
MIRI: Perintah nengeri nengah Opis Pengerejista Bansa ( JPN) nyengkaum bala pengari rayat ( YB) ransing bejalaika pengawa mantu bansa Penan ngaga dokumen pengelala ti nyengkaum surat pengada enggau tingki.
Kaban Kunsil Nengeri (ADUN) Telang Usan Dennis Ngau madah berindik ari pemerat pengawa dipejalai nengah unit mindah kin kitu JPN nyengkaum maya pejalai iya ngagai pengentap baru pendiau Penan di Ulu Baram, makin kurang penyampau bansa Penan diatu nadai ngembuan dokumen nya.
“Sekeda bansa Penan ti enggai mansutka diri ari palan asal sida (kampung) lalu nganti diumbuk, sida nya ti bedau bisi dokumen tang mayuh sida di udah mindah kediri ke palan pengentap baru diatu udah bisi surat pengada enggau tingki,” ku Dennis madah ngagai pengarang berita The Borneo Post kemari, nyangkal dawa ti madahka bansa Penan nadai ngembuan sebarang dokumen pengelala.
Ba ripot dalam surat berita kena 5 September ke alai Ex- Sapit Menteri Pelajar Datuk Hon Choon Kim madahka mayuh bansa Penan nadai ngembuan dokumen pengelala.
Nitih ku Dennis, JPN udah chakah bejalaika pengawa ngelawa kandang menua ulu Baram sereta bagi menua ke bukai di Sarawak, ngulihka peranak ke agi diau dalam kampung dikena meri sida peluang minta dokumen pengelala nya.
Ku iya, JPN bisi rikod penyampau peranak ari kandang menua pesisir kelebih agi ari Baram ti bisi minta dokumen lalu dokumen nya benung digaga.
Iya madahka sekeda ari chunto ke alai mayuh program tauka pengawa bansa Penan tu empu datai lalu betemu enggau aku, minta dokumen tu lalu aku empu mega bisi ngusung rumah sida sereta mai unit mindah kin kitu, endur ngaga peminta.
“Berindik ari ti pengawa dipejalai opis enggau pengari rayat tu, penyampau peranak asal ti nadai dokumen pengelala majak kurang,” ku iya nandu.
Ambika chunto, ku Dennis dalam bulan Febuari 2016, program rejista unit mindah kin kitu udah diatur di Long Meraan begulai enggau Petronas.
Ku iya, tim mindah kin kitu mega bisi di Long Seridan lalu dalam bulan Ogos 2017, oper- asyen khas udah dipejalai tim ‘on-line’ unit mindah kin kitu JPN di Long Seridan/Meraan enggau Long Balau.
Menua tu endur operasyen ke alai tim mindah kin kitu ti disebut tauka dipadah Datuk Hon iya nya alai bansa Penan diau mendam lalu kitai enggai dipeda nyangkal pekara ti disebut iya, ku Dennis nerang silik.
Ku iya, bisi sekali pekara nyadi ke alai iya bisi mai sekeda pom peminta ngagai bansa Penan di kaki lima opis Majlis Islam Miri ke dulu suba, semina deka mantu sida lalu pengudah nya nganjung dokumen nya ngagai JPN.
Kemaya hari tu, makin kurang penyampau peranak menua nya nadai ngembuan surat pengada enggau tingki laban unit tim mindah kin kitu JPN begalaika pengawa sida nyerumba atur program ba mayuh bengkah menua di Baram, ku iya nambah.
Sekeda bansa Penan ti enggai mansutka diri ari palan asal sida (kampung) lalu nganti diumbuk, sida nya ti bedau bisi dokumen tang mayuh sida di udah mindah kediri ke palan pengentap baru diatu udah bisi surat pengada enggau tingki.