PPD Tatau udah ngatur licha khas UPSR ungkup nembiak SK Tatau
TATAU: Opis Pelajar Pelilih (PPD) Tatau udah ngatur Licha Khas nyerumba Ujian Pencapaian Sekolah Rendah (UPSR) ungkup chalun peresa Sekula Primari (SK) Tatau di sekula nya, kemari.
Licha dikenataika Pemesai PPD Tatau, Mohadi Mobin lalu iya mega bisi nyuaka pemeri perengka tulis ari diri empu ungkup peresa UPSR ngagai Ketuai Pengawas SK Tatau, Amirul Mohamad sebedau disua ngagai 137 chalun sekula nya.
UPSR deka berengkah kena 11 ngagai 14 September tu enggau semua chalun SK Tatau deka napi peresa tu 137 iku, ke nyadi chalun sekula pemadu mayuh di Pelilih Tatau.
Kepala Pengajar SK Tatau, Janudin Ab Rahman meri terima kasih ngagai PPD Tatau ke mega meri peransang ngagai chalun UPSR sereta bisi nyuaka pemeri ari iya empu.
“Kami nagit 95 iku chalun pas ari 137 kesemua chalun tauka 69.34 peratus sereta gred purata sekolah (GPS) 2.60,” ku iya seraya nambah, chalun SK Tatau taun tu pemadu iya manah.
Ku iya, kami ngarapka tagit sekula deka dijapai lalu chalun dikeandal deka bulih 6A iya nya 10 iku.
Iya minta piak sekula enggau apai indai besampika pemujur bala chalun ti deka napi peresa nya.
Program bukai ti bela diatur sekula nya iya nya belepa runding enggau agih pemakai ari restoran pemakai, berekat penemu, sampi enggau sembiang, pengawa nyuaka perengka tulis ari Yayasan Pemansang Ekonomi Islam Malaysia (YAPEIM) sereta ke bukai.
Berebak enggau nya, Mohadi ngarapka bala chalun ti napi peresa nya taun tu deka ulih nyapai pemujur ti nyulut agi.