LPK UPP Sibu udah nyendiaka agih belanja projek, kimpin pengerai ungkup orang indu
SIBU: Kaunsil Servis Komuniti ( LPK) Parti Rakyat Bersatu ( UPP) Sibu udah nyendiaka agih belanja dikena bejalaika mayuh projek tauka kimpin pengerai ungkup orang indu.
Chairman iya, Dato Andrew Wong madah, agih belanja nengah Langgur Pemansang Sibu Keterubah (RS1) nya deka diberi ngagai klinik-klinik pengerai sereta gerempung ukai dikuasa perintah (NGO) dikena mantu bejalaika projek enggau kimpin pengerai.
“Nengah kimpin baka tu, kitai ngarap ulih nyaga pengerai raban indu enggau naka pemanah awak ke sida lantang agi ngintu ruang bilik,”ku iya.
Andrew Wong madah munyi nya rambau bejadika Kimpin Pengerai Pap Smear orang Indu ba Poliklinik Jalan Oya, kemari.
Kimpin nya diatur Poliklinik Jalan Oya sereta nerima pemeri ari LPK UPP Sibu nengah RS1. Sebedau tu, LPK UPP bisi ngungkupka RM3,900 dikena ngemujurka kimpin nya.
Sama bisi datai Sapit LPK UPP Sibu, Andrew Shilling, Pemesai Perubat Poliklinik Jalan Oya, Dr Rose Ngui, Pakar Perubat Ruang Bilik Poliklinik Jalan Oya, Dr Kang Pei San, chalun ulih menang UPP sitak Parlimen Lanang, Andrew Ting sereta ke bukai.
Kenu ku Andrew Wong, kimpin pengerai pap smear nya beguna amat lalu pemeri nya dikearap ulih meri penyedar ngagai raban orang indu ditu.
“Kimpin pengerai tu ukai keterubah enggau kepenudi ungkup taun tu tang iya dipe- jalaika nengah RS1,” ku iya.
Iya meri terima kasih ngagai Pathlab laban udah meri kerejasama bekaul enggau program nya.
Nangkan nya Dr Rose madahka timbal ari mensia mayuh ngagai program nya chukup manah.
Ari dua kimpin ke udah dipejalai sebedau tu, piak kami nerima penatai entara 120 ngagai 170 pesereta.
Tang kimpin serak tu ku iya, bisi 200 pesereta udah datai beperesa pap smear.