Raban graduet Bidayuh diperansang nampung pelajar ngagai tikas PhD
KUCHING: Raban graduet Bidayuh dipinta ngerebut sebarang sekularship ti disediaka perintah nengeri ungkup peranak Sarawak dikena nampung pelajar sida ba tikas Doktor Falsafah (PhD).
Sapit Menteri Kuasa Karan, Teknologi Gadung enggau Ai, Datuk Sri Dr James Dawos Mamit madah raban nembiak Bidayuh meseti bisi pengingin nyapai tikas pemadu tinggi dalam pelajar laban semina nengah pelajar aja sida ulih nyamin pengidup ti tegap dudi hari.
Iya mega nangkan bala graduet ke alai penyulut enda ulih dijapai enti nadai pengiruh, nya alai, sida meseti manggaika pelajar nyadi pugu pemujur dalam pengidup.
“Nyadi pengarap aku deka meda mayuh agi bansa Bidayuh, kelebih agi ari komuniti Pinyawa di Padawan, nyulut dalam pelajar sida datai ba tikas PhD,” ku iya rambau Pengerami Makai Lemai Pengasih Serakup Pinyawa Asar Genap Taun ke-21 sereta pengawa nyuaka insentif pelajar di Balai Komuniti Tapah, KM38 Jalai Serian-Kuching, semak ditu, malam Hari Enam.
Dawos ke mega Kaban Parlimen (MP) Puncak Borneo muji pengawa ti udah dipejalai serakup nya ngempitka agi tanggam kaul enggau pemereti ati antara raban ari genturung pendiau ti bebida Serakup Pinyawa Asar.
Iya mega ngansak bala kaban serakup ti mujur, nyengkaum bala graduet gawaka komuniti nengah pengawa ngaul diri ba mayuh bengkah aktiviti serakup nya.
Pengudah nya, Dawos bisi nyuaka insentif sepenyampau RM9,900 ngagai 48 iku nembiak ti nyulut dalam pemutus peresa perintah sida.
Lebih 700 iku kaban serakup bisi datai ngulu pengerami makai lemai nya.