Anang nutup IPG, Sarawak agi suntuk pengajar
Perintah besai meseti berundingka pekara tu baru laban atur nya besibil enggau juluk nengeri tu
MIRI: Perintah besai patut berunding baru sentang atur deka nukar dua Palan Pematih Pengajar (IPG) di nengeri tu nyadi Palan Pelajar Vokasional (PPV).
Chairman Gerempung Apai Indai enggau Pengajar (PIBG) Nasional Sarawak, Wan Zain Syed Mohdzar madah nyema pekara tu enda ulih diseliah, ke alai perengka guna tu patut diserah ngagai Sarawak.
“Perintah besai patut ngiga perengka guna bukai ungkup tuju pelajar teknikal tauka vokasional, ukai nutup IPG Miri enggau IPG Rajang,” ku iya madah ngagai Utusan Borneo kemari.
Sebedau tu, dua IPG ti deka ditutup iya nya IPG Rajang ti bepenau nempa raban akademik Iban enggau IPG Miri ba pelajar Penan.
Ngelansa silik, sekalika IPG tu ditutup tauka ditukar pangku pengawa iya, ke alai perintah besai patut berunding enggau perintah nengeri nyemetak agi.
“Kebuah pia laban kitai patut nemu nama perambu ke bendar perintah besai laban kededua IPG tu bela beguna lalu udah nempa mayuh pengajar,” ku iya nerang.
Nitih ku iya, nyema pangku pengawa berubah ngagai PPV, ke alai perintah nengeri patut ngambi pemerat ba pa- lan tu pulaika pemaik peranak Sarawak empu. “Ambika chunto, juluk transformasyen bidang be- tanam betupi di Sarawak deka manah agi ripih iya laban PPV tu ulih nempa graduet menua ti bepengelandik,” ku iya.
Berebak enggau nya, Sarawak deka ngembuan Petroleum Sarawak (Petros) ti mega begunaka orang gawa landik menua tu ba bidang minyak enggau gis.
“Tentu kitai dekaka tetiap ubah tu meri pemaik ngagai peranak menua tu lalu ukai nya digaga ketegal penguntung sekeda piak,” ku iya nerang.
Taja pia, iya tetap enda setuju pengawa digaga perintah besai nukar pangku pengawa IPG nya.
“Kitai dekaka nisbah 9:1 pengajar di Sarawak, laban kitai agi suntuk pengajar menua tu ngajar di menua pesisir, nyema IPG tu ditukar, tu deka ngemuntanka juluk perintah nengeri,” ku iya nyemetak.
Ba penemu pengajar, Safrina Masni, madahka pengawa nukar pangku pengawa IPG ngagai PPV bisi pemanah enggau pengurang iya empu.
“Nyema IPG tu ditutup, ke alai iya deka ngurangka penyampau pengajar menua tu ti terlatih laban nyangka bala pengajar dianjung ngajar di luar Sarawak,” ku iya.
Berebak enggau nya, sekula mega deka ngambi bala pengajar ti nadai ngembuan pelajar ngajar di sekula sida.
Perintah besai patut ngiga perengka guna bukai ungkup tuju pelajar teknikal tauka vokasional, ukai nutup IPG Miri enggau IPG Rajang. Wan Zain Syed Mohdzar Chairman PIBG Nasional Sarawak