Tim SUPP Lanang deka bebendar mantu rumah panjai ke nadai karan
SIBU: Tim Parti Sa’ati Rayat Sarawak (SUPP) tauka Barisan Nasional (BN) P211 Lanang udah neruska pengawa bejalai ngabas ngagai rumah panjai di sitak Batu Wong, Durin, Sengan, Ulu Menyan, Salim- Belalang, Ulu Salim, Jalai Oya enggau Tanggi semak ditu, apin lama ke udah.
Rumah panjai ke bisi ditapatka sida iya nya Rumah Puteh, Rumah Malin, Rumah Mani, Rumah Don Bosco, Rumah Merikan, Rumah Setia, Rumah Lin, Rumah Andrew Keneth, Rumah Changing, Rumah Gelungan, Rumah Suang, Rumah Jang Anjang, Rumah Anthony, Rumah Suring, Rumah Anatha, Rumah Strot, Rumah Winnie, Rumah Nyaring, Rumah Kelak, Rumah Abong, Ru- mah Ajai, Rumah Bunga, Rumah Undi enggau Rumah Naning.
Pejalai tu diketuai dua chalun ditaga ulih menang SUPP/BN bagi kerusi Parlimen Lanang Kelvin Kong enggau Kaunsilor Joseph Chieng.
Sama bisi nyempulang sida rambau atur pejalai iya nya Sekretari SUPP Pampang Dudong Kong Sing Ping, Chairman Unit Bumiputera SUPP Cawangan Dudong Kaunsilor Ladong Engkol sereta bala kaban parti ke bukai.
Rambau atur pejalai nya, ku Kelvin, sida berasai tekenyit sereta sinu meda ke bendar mayuh agu rumah panjai di menua pesisir di baruh sitak Parlimen Lanang nadai ngasaika perengka guna bekal elekterik enggau ai paip.
Sekeda ari rumah panjai iya nya Rumah Winnie Badindang di Ulu Menyan, Rumah Naning Salleh, Rumah Abong Mujung enggau Rumah Munggai Enteri di sitak Tanggi.
“Kesemua rumah panjai tu jauh di menua ulu tang bisi disambung jalai alun napatka iya,” tandu iya.
Ku iya, tim nya nguji mantu lalu deka mantaika isu nya ngagai piak Sarawak Energy Berhad enggau Lembaga Air Sibu ngambika pengawa ti patut dipejalai.
“Kami deka nitihka pejalai pekara tu dataika bekal elekterik enggau ai ulih disambung enggau naka penyampat pulaika pemaik peranak di rumah panjai nya,” tandu iya nyemetak.
Berebak enggau nya, ku Kelvin, Rumah Don Bosco di sitak Durin kala dituntung penusah angus enam taun ke udah tang nitih ku peranak rumah panjai nya, sida nadai nerima bantu ari sebarang piak sekumbang timpuh nya.
“Nya alai, tim kami terus meri bantu ramu rumah dikena ngelempungka tating penusah sida,” ku iya.
Ba lansa ke bukai, Kelvin mega nyemetak madah, nyema chalun SUPP/BN ulih ngerampas baru penuduk Parlimen Lanang maya Pengawa Bepilih Besai Ke-14 (PRU14) ti deka datai ke alai kitai deka nentuka semua peranak kelebih agi di kandang menua pesisir ulih ngasaika bekal elekterik enggau ai enda lama agi.