KGBS enda setuju enggau atur KPM deka nutup IPG
KUCHING: Atur Opis Pelajar Malaysia (KPM) ti deka sekeda Palan Pematih Pengajar di Malaysia nyengkaum ba Sarawak, enda disetuju Kesatuan Guru Bumiputera Sarawak (KGBS).
Presiden KGBS Ahmad Malie madahka, atur ngubah pengawa IPG nya atur ti nikal baru ke belakang sereta ulih nyekat tauka ngemuntanka juluk perintah Sarawak ke deka nempa mayuh pengajar asal ari menua tu.
Lebih agi ku iya, sebuah IPG di Sarawak deka ditukar tanggungpengawa tauka ditutp iya nya IPG Kampus Rajang iya sebuah IPG ti mayuh sejarah sereta udah nempa mayuh graduat pengajar di nengeri tu.
“KGBS enda tentu besetuju enggau atur KPM ti nukar tanggungpengawa sekeda IPG ari 27 buah IPG di serata menua.
“Enggau lurus ati KGBS meda atur nukar tanggungpengawa tu kebendar atur nikal ke belakang lebih agi enti dipeda ari segi peminta guna pengajar ari menua tu empu.
“Nukar tanggungpengawa IPG Kampus Rajang dikeirauka ulih ngemuntan pengawa perintah nengeri ke deka nempa lebih mayuh agi pengajar ari menua tu empu. Tu mega ulih ngelubahka pengawa nambahka kuota pengajar di sekula,” ku iya madah ngagai Utusan Borneo.
Malie ti ngarika KGBS mansutka pekara nya lebuh dipinta meri penerang tauka timbal bekaul enggau isu semilan ari 27 buah IPG di Malaysia ti nyengkaum IPG Kampus Miri enggau IPG Kampus Rajang ke diperambu deka ditutup jemah ila.
Bejaku baru iya madahka atur pengawa ngambi nembiak baru masuk ngagai IPG nya mega deka tekeruga kelimpah ari ti enda tetapika peminta nambahka pengajar baru enggau jampat berindik ari rayat ti majak nambah.
“Nyema beberapa buah IPG udah ditukar tanggungpengawa reti iya penyampau pengajar ke diasil tauka ditempa mega deka kurang dalam timpuh panjai.
“Nya alai ba penemu KGBS ke patut iya perambu deka nukar fungsi beberapa buah IPG nya enda patut nyadi enda ngira maya laban pengawa pengajar tu pengawa ke seruran diguna dikena ngemansangka menua enggau bansa jemah ila,” ku iya.