Kimpin Pengelikun Jalai Alun diatur di Kuching Sentral, 13 Sept
KUCHING: Mensia mayuh di mengeri tu diperansang datai ngulu Kimpin Pengelikun Jalai Alun Hari Malaysia Yamaha - Kuching 2017, ti diatur kena 13 September tu di Kuching Sentral berengkah pukul 10 pagi ngagai 4 lemai.
Chairman Kuching Bicycle & Motor Traders Association (KBMTA) Lau Soon Yiun madahka, kimpin nya sebengkah ari program pengelikun ba jalai alun renggat bansa sereta keterubah dibai ke Sarawak.
Kimpin nya ti ngena rambai jaku ‘ Alah Bisa, Tegal Biasa, Berhenti DI Lampu Merah Amalan Mulia’ diatur KBMTA begulai enggau Hong Leong Yamaha Motor Sdn Bhd (HLYM) enggau Malaysia Motorcycle & Scooter Dealers Association (MMSDA).
Juluk pengatur kimpin iya nya melabaka urung 500 ngagai 600 iku orang datai ngagai kimpin nya ila.
“Kami nesau orang mayuh ngambika sama sampal datai ngagai kimpin pengelikun ba jalai alun tu kena 13 September tu, ti dipelabaka deka dipenyadika Menteri Kaunsil Kandang Menua enggau Pengawa Berumah, Datuk Pro. Dr Sim Kui Hian.
“Objektif kimpin tu diatur iya nya dikena ngajar sereta meri penyedar ngagai penguna jalai alun ngambika enda ngelanggar atur lampu trafik. Laban penusah bebadi ba jalai alun tu bepun ari kitai penguna jalai alun empu baka ngelanggar atur lampu trafik.
“Nyerumba kimpin tu mega kami bisi meri 300 iti helmet ti dikemendarka SIRIM dikena nganti helmet ke udah tuai tauka lama enggau 300 jaket pengelikun ngagai penguna motosikal, tu sapa dulu datai nya dulu bulih,” ku iya.
Lau mansutka pekara nya dalam aum pengarang berita Kimpin Pengelikun Jalai Alun Hari Malaysia Yamaha - Kuching 2017 ke diatur ba sebengkah hotel ditu, lemai kemari.
Entara aktiviti ke dipejalaika maya nya ila nyengkaum meri penyedar ngagai orang mayuh ngambika enda ngelanggar atur lampu trafik dikena nyeliahka penusah bebadi ba jalai alun.
Nyerumba kimpin tu, pengawa meresa motosikal enggau enda bebayar sereta servis motosikal ngena rega khas bisi dipejalaika.
Nitihku iya entara pemesai ke dipelabka bisi datai mayta tu ila iya nya Kaban Kunsil Nengeri Batu Kitang ti mega Chairman Majlis Pebandaran Padawan (MPP) Lo khere Chiang; Direktor Jabatan Pengangkutan Jalan Negeri sarawak Mohd Syafiq Anas Abdullah; Ketuai Polis Pelilih Menua Kuching ACP Abang Ahamad Abang Julai; Direktor Opis Pengelikun Jalai Alun Davina Agnes Enteli enggau ke bukai.
Sama bisi datai ba aum pengarang berita nya kemari Chairman Pengatur Kimpin Aaron Tay enggau ke bukai.