Penumbuh JKKK strategi ngajar komuniti gawa
SRI AMAN: Pengawa numbuhka Komiti Pemansang Enggau Pengelikun Genturung Pendiau ( JKKK) di tetiap genturung pendiau enggau rumah panjai di nengeri tu nyadi siti ari strategi dikena ngadaka komuniti ulih gawa ngatika diri sereta chakah ba pengawa pemansang.
Sapit Menteri Dalam Menua Masir Kujat madah, gempung JKKK bejalaika pangku pengawa beguna endar nyadi raban gawa ba renggat pun menua.
“Pengawa nyadi ketuai enggau ngatur pengawa gempung ti sikar nyadi pugu pekara besai ngangkatka pemansang genturung pendiau progresif agi sereta beripih.
“JKKK nyadi ‘Focal Point’ lebuhka ngaul sereta berandau enggau perintah laban projek enggau bantu disediaka perintah deka diagih, diterima sereta diatur sida,” ku iya.
Masir ke mega Kaban Parlimen ( MP) Sri Aman mansutka jaku tu lebuh bejadika Pengerami Makai Lemai Genap 30 Taun, JKKK Taman Siang, Sri Aman, ditu, malam kemari.
Nitih ku iya, bala ketuai raban bansa patut mantaika peminta enggau peneka bala komuniti di genturung pen- diau enggau nejuka penguntung diri empu.
Ku iya, pemansang ti dijapai nengeri ke diatu asil ari komitmen enggau pengeransing perintah sereta bala ketuai ti bepenau udah dipilih rayat empu.
Sama bisi datai Chairman JKKK Taman Siang, Edmeade Rujis sereta bala kaban JKKK ke bukai.
Berebak enggau nya, Masir mega bisi ngemendarka agih belanja bela penyampau RM5,000 ngagai JKKK enggau Biro Indu ungkup taun 2018.
Bisi mega sida rindu naruh duit MRP tu ari dikena. Duit tu ukai ungkup ditaruh tang patut dikena gerempung tauka NGO ngatur aktiviti ke pemaik mensia mayuh. Datuk Abdul Karim Rahman Hamzah Menteri Dagang Temuai, Seni, Main Asal, Nembiak enggau Lumba
Pekara nya dipansutka Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah rambau nyuaka chek MRP ungkup sitak Kunsil Nengeri (DUN) Asajaya ba Dewan Suara Kota Samarahan ensanus.
Iya madah belanja ke diberi nya ungkup guna NGO tauka serakup mit ba genturung pendiau ngatur aktiviti ke pemaik mensia mayuh lalu ukai ungkup tuju bukai.
Ku iya, bisi NGO tauka serakup mit ba genturung pendiau salah guna belanja nya dikena ngatur aktiviti ke limpang ari tuju penumbuh gerempung.
“Ambika chunto Gerempung Apai Indai enggau Pengajar (PIBG) bisi ngena belanja MRP dikena ngatur aktiviti lumba perau lalu tu udah jauh limpang ari tuju gerempung tu ditumbuh,” ku iya.
Abdul Karim ke mega ADUN Asajaya madah bisi mega NGO tauka serakup mit genturung pendiau enda nguna MRP ke udah diberi nya.
“Bisi mega sida rindu naruh duit MRP tu ari dikena. Duit tu ukai ungkup ditaruh tang patut dikena gerempung tauka NGO ngatur aktiviti ke pemaik mensia mayuh,” ku iya.
Tambah mega, ku iya bisi mega NGO ti kelalu regas ngatur aktiviti ngujungka belanja nya abis tekala nya.
“Nya alai, aku deka ngelalau semua penerima geran MRP tu patut nguna wang tu enggau manah, keingatka pengarap ke udah diberi mensia mayuh ngagai kita enggau bala anak kita,” ku iya.
Ba pengawa nya, Abdul Karim nyuaka chek MRP ngagai 123 penerima ke mungkur belanja manggai RM1.181 juta.