Perundingka inisiatif ekonomi baru ungkup peranak Semarahan
Enti Jematan Btg Semarahan udah tembu, servis perau tambang nadai agi
KOTA SAMARAHAN: Pemansang di Bagi Menua Semarahan kelebih agi ari sukut sistem penyambung ukai semina meri pangka positif tang mega mangka ngagai ekonomi sekeda peranak dia.
Beambika chunto pengawa ngaga Jematan Batang Semarahan, tentu deka ngerichahka agi sistem penyambung antara Pelilih Kota Samarahan enggau Asajaya penembu iya ila.
Taja pia, ngagai bala dagang perau tambang di Penyangkai Feri Muara Tuang, pemansang ti dibai tu tentu meri pangka negatif ba pemansut penatai pemisi sida pengudah jematan nya tembu ila.
“Kami ukai nulak pemansang ti dibai perintah tang pekara ti dikearapka kami ngambika siti inisiatif ekonomi baru dipejalai dikena mantu kami.
“Pekara tu beguna endar laban pengudah Jematan Ba- tang Semarahan tu tembu ila, tentu nadai agi orang tambah motosikal deka ngena servis perau tambang tu ngelayang ke seberai,” ku Keram Usop, sekeda ari pedagang perau tambang lebuhka dirandau di Penyangkai Feri Muara Tuang ditu, kemari.
Iya ke diatu manggai umur 64 taun madah sebedau tu pedagang perau tambang di kandang menua nya kala baum begulai enggau ejensi perinta bekaul enggau ngiga jalai pemutar pemadu manah ngagai sida.
Taja pia ku iya, dataika sehari tu, bedau bisi penerang baru bekaul enggau inisiatif ti deka diambi dikena mantu sida.
Ba lansa ke sama, seiku da agi pedagang perau tambang, Culo Sanny, 44 taun, bela mantaika pengirau ke sama.
Ku iya, bisi sekeda pedagang perau tambang udah ngetu gawa laban penatai pemisi majak kurang.
“Enti deka ngemaruka lisin perau tambang begunaka belanja mega, RM41 setaun, ditambah enggau rega minyak enda tentu, penanggul ngujungka penatai pemisi kami majak kurang,” ku iya nerang.
Berebak enggau nya, ku Culo, Jematan Batang Samarahan ti dipelaba tembu 2018 tu endang meri pangka ba pemansut penatai pemisi orang tambang ditu.
“Nya alai, kitai endang andal amat perintah ulih mantu kami ngadaka pemansut penatai pemisi baru ngagai raban penambang ditu ngambika kami ulih ngulihka belanja kena idup enggau ruang bilik diri pengudah jematan nya tembu ila,” ku iya nambah.
Kelimpah ari Keram enggau Culo, sebana ke sama bela dibantaika dua iku nembiak ke mega pedagang perau tambau dia, Mariadi Dollah, 30 taun, enggau Busrah Edi, 27 taun, bela irauka pemansut penatai pemisi seduai.
“Kami ngarapka perintah ulih meri inisiatif baru ngagai pedagang perau tambang ngambika pemansang ti dibai enda meri pangka enda manah ngagai penambang ditu,” ku seduai.
Nya alai, kitai endang andal amat perintah ulih mantu kami ngadaka pemansut penatai pemisi baru ngagai raban penambang ditu ngambika kami ulih ngulihka belanja kena idup enggau ruang bilik diri pengudah jematan nya tembu ila. Culo Sanny Pemenggi perau tambang