Pengawa ngemansang Pencha Kuntau Spring Sarawak endang pengawa manah
SIBU: Enam iku nembiak Guro John Siang udah ngambi Tambak Guro ari iya, empai lama tu tadi.
Sida tu iya nya Ludan Sato (Guro Dulang Sempandai), Williejam Bisa (Guro Tapang Bekumbai), James Rap- hael Lanting (GuroTuntung Lang), Guro, Nully Ibat (Guro Lang Ngindang), Julia Japok (Guro Cherira) enggau Fabian Nyambung (Guro Ijau Lelayang).
Pengawa ke diatur ba Kelang Kuntau Spring, Batu 16, Jalai Oya nya bela dikemata pengari Kaban Kunsil Nengeri (ADUN) Tamin Ir. Christopher Gira Sambang iya nya Ajan Dau.
Bejaku maya tu, ku Ajan nengah pesan ari Gira madahka pengawa bekuntau baka ke dikemansang Pencha Kuntau Spring Sarawak nya endang pengawa ke manah.
Ku iya, iya semampai nyukung pengawa baka nya lalu ngarapka gerempung nya ngembuan akaun diri empu ngambika muntang alai beberika bantu.
Dulu agi ari nya, Guro Siang madahka pengandal diri nerima saup ari pemesai lebih agi bansa Iban empu nyaup iya ngemansangka agi pengawa lama baka nya.
“Aku andal amat ngaga kelang alai belajar tu manah agi ari ke diatu ngambika bala nembiak ke belajar muntang sereta lantang agi belajar kuntau,” pia ku iya maya nya.
Kelimpah sida enam, sepuluh iku nembiak ke bukai mega udah mujur nembuka pelajar kuntau sida.
Sama bela datai meda pengawa tu iya nya ex-kaunsilor Duli Sanggau, Guro Nadong sereta bala tuai rumah ke besemak.