Rumah Adam Sungai Nawang dituntung penusah bah tunggal malam ensanus
MIRI: Tikas ai niki ngenyit peninggi dua kaki ngagai Rumah Adam Sungai Nawang ngasuh peranak dia tepekul lalu enda sempat mindahka keresa rambau penusah bah tunggal ditu, kemari.
Siku ari peranak rumah panjai nya, Wellesly Bolly Ongie, 53 taun, madah, berindik ari penusah nya ngujungka 79 iku peranak ari lapan pintu napi penanggul.
“Ujan bangkat urung pukul 5.10 lemai dataika pukul 10 malam. Ai berengkah niki ari dapur lalu ngampuhka bilik besai, urung dua kaki peninggi.
“Taja pia, kami berasai lantang pengudah bah surut urung pukul 12 tengah malam, ujan berengkah badu,” ku iya.
Ku iya, tu penusah ketiga kali nyadi ba taun tu mangka rumah panjai nya.
Ba lansa ke sama, ripot Komiti Pemutar Penusah Ngenyit Nengeri ( JPBN) Sarawak madahka ujan bangat enggau ai pasang raya Sungai Nawang ngujungka penusah bah tunggal nyadi.
“Gaya diatu belinsur manah enggau ai bah surut lalu ujan nadai agi labuh sehari tu (kemari).
“Bisi empat iku Raban Nyaga Pengelikun Mensia Mayuh Malaysia ( APM) enggau enam iku raban Balai Bomba enggau Penyah Penusah (BBP) Marudi ngaul diri dalam operasyen meresi rumah panjai nya,” ku iya.
Pengudah penusah tu teputar, semua peranak enda dipindah ngagai palan pengenduh bah lalu pengawa beripai begulai enggau piak bekuasa meresi rumah panjai kemari.