Piak bekaul dipinta regas agi ngatur program penyedar pasal kes pasung

KUCHING: Gerempung Ukai Dikuasa Perintah ( NGO) Dayak bepenemu piak bekaul patut chakah agi ngatur program penyedar bekaul enggau empas negatif kes pasung tauka kes pejal beleman mali, lebih agi pasal empas negatif ke ditapi orang ti dileman.

Sebengkah NGO Dayak, PEDAS ke diarika Vice Presiden iya, Victor Ason (gambar) madah piak ke bekaul patut chakah meri penerang ngagai raban bansa sentang penyedar pasal penanggul tauka isu nya.

Iya bepenemu nembiak sekula nyengkaum ba renggat sekula primari mega patut diterangka nama pekara ke patut dikereja nyema kes nya nyadi ba diri empu tauka nyema nemu bisi nyadi ba orang bukai.

“Piak bekaul patut chakah agi baka ngatur licha ba sekula, awakka nembiak nemu kes dipejal beleman nya ngenataika penanggul lalu nemu kini tungga ngaga riput nyema pekara nya bisi nyadi.

“Nambahka nya enti ulih piak ke bekaul mega patut meri licha ngagai biro orang indu pasal penanggul tu ke majak nyadi sereta ngirauka ati, sereta ngajar sida baka ni deka ngelala sereta beratika ubah ulah dalam ruang bilik,” ku iya madah ngagai Utusan Borneo lebuh ti ngenang kes pasung tauka beleman mali ke majak nyadi nyengkaum bisi nyadi ba bansa Dayak.

Bejaku baru iya madahka penyadi kes nya ke mega bisi nyadi ba raban bansa Dayak chukup ngirauka ati, lebih agi bansa Dayak ti dikelala penuh enggau basa sereta penyiru.

Ku iya, pengelemi ba pasal jalai pengarap mega kebuah ari penyadi pejal beleman mali.

“Utai ke pemadu beguna iya nya penyedar ba jalai pengarap. Laban semina ngena chara tu aja kitai nemu berati sereta nemu nama utai ke manah enggau jai dikereja.

“Penyedar ari orang ke diau ngelinggi ngagai nama pekara ke bisi nyadi mega mat beguna,” ku iya.