Projek Simfoni Kasih deka diatur ba Rh Selikau kena 22 - 23 Sept

KUCHING: Unit Psikologi enggau Kerjaya, Kolej Vokasional Betong deka ngatur pengawa Bejadika Projek Simfoni Kasih Edisi 4.0 enggau Bejadika Tangga Rumah Selikau, Nanga Selaut Tengah, Julau, kena 22 ngagai 23 September 2017 tu.

Nitih ku penerang ari Chairman Pengatur, Kaunsilor Sangin Anak Juat, projek tu deka dipenyadika Kaban Parlimen (MP) Julau, Datuk Joseph Salang Anak Gandum, bepalan di Rumah Selikau, Nanga Selaut Tengah, Julau.

Program pengelama dua hari berunggu deka dirichah enggau bemacham aktiviti baka Pekit Ngelinsu, Outreach & Pengawa Beperesa Pengerai (KPJ Sibu), Pekit Poco- Poco, Lumba Rama Simfoni Kasih, Simfoni Idol, Chabut Tikit Benasit, Pengawa Pemerindan Raban Artis (Teelong T) sereta ke bukai.

Ku Sangin, batang tuju ngatur program tu iya nya nerenakka ulah bebasaka orang tuai ngagai bala nembiak di kolej nya enggau bala pelajar UNIMAS seriris enggau Polisi Orang Tuai Menua (DWEN).

Tuju ke bukai nyengkaum meri awak ngagai bala pelajar UNIMAS enggau bala pengajar peranak Terengganu ke gawa di nengeri tu nanggam pemanah gaul sereta begulai bebaik enggau peranak ari Terengganu.

Program tu mega dikena ngansah penau nyadi ketuai, ngatur pengawa, komunikasyen sereta nerenakka pemanah ulah ngagai bala pesereta program.

Nangkan nya ku Sangin, program tu mega dikearap ulih ngenegapka agi penyerakup pupu bansa kelimpah meri penyedar ba pemesai guna pelajar enggau nyaga pengerai dalam pengidup.

“Nya kebuah kami ngaul raban ari KPJ bejalaika pengawa beperesa pengerai ngambika peranak di menua tu nemu lalu ngintu pengerai sida.

Kelimpah ari unit tu, gempung ke bisi ngaul diri ngemujurka projek tu ila nyengkaum D’Dayak Café, Palan Perubat Pakar Sibu, Gilson’s Production, Cats FM, Serakup Apai Indai enggau Pengajar (PIBG) Kolej Vokasional Betong, Serakup Alumni VOCTECH Betong sereta ke bukai.