S’wak mengkang nagih satu pertiga ari asil TTx
KUCHING: Sarawak mengkang nagih satu pertiga tauka lebih ari asil chukai nengah sistem chukai dagang temuai (TTx) ke baru, ku Menteri Dagang Temuai, Seni, Main Asal, Nembiak enggau Lumba Datuk Abdul Rahman Karim Hamzah.
Pinta nya ku iya diperunding entara Perintah Sarawak enggau Perintah Besai nengah Opis Menteri Pekara Wang.
“Pinta tu nadai agi diperunding entara Opis Menteri Dagang Temuai Sarawak enggau Opis Menteri Dagang Temuai Perintah Besai,’ku iya.
Abdul Karim mansutka penerang nya ngagai pemnberita pengudah ngulu program Paint The World 3.0 2017 ke diatur di Dewan Suarah ditu, kemari.
Ngenang kaul ke sama, iya madah sistem chukai baru nya nerima timbal manah ari orang dagang ba industri hotel.
Tajapia ku iya madah sekeda tusun pengawa sistem chukai nya patut diserenih manah agi.
“Ambika chunto, rumah lodging pan dikena chukai ke alai sekeda nya bisi 10 nyentuk ngagai 20 iti katil.
“Temuai ke diau diak mayar mar agi ari rega hotel lima bintang. Enti bisi 20 iti katil dalam seiti bilik, sida mayar RM200 ketegal seiti katil mayar chukai RM10,’ku iya.
Abdul Karim nambah iya enda tentu nemu sekalika pekara nya(rumah lodging enggau hotel budjet) bela dibungkur dalam sistem chukai baru.
“Tang aku dipadah diak semua, ari hotel budjet nyentuk ngagai hotel dibungkur sistem chukai dagang temuai ke baru.
“Awakka aku meresa pengamat pekara tu dulu,’ku iya.
Ba sentang chukai ‘heritage’ ke diterit ba Langkawi, Pulau Pinang, Melaka engau Sabah, Abdul Karim madah Sarawak enda deka neritka chukai nya.
Ku iya, udah kelalu mayuh bengkah chukai diatu lalu enda manah ungkup industri dagang temuai.
“Kitai enggai ngenusah temuai ketegal enti nuan meda bil, kelalu mayuh chukai baka ke chukai dagang temuai, servis, GST enggau heritage,” ku iya nambah.