Bisi 200 temuai ngulu Pengawa Ngirup Teh nyerumba Hari Pengada TYT Ke-81
KUCHING: Pengerami Hari Pengada Tuai Pemegai Menua (TYT) Sarawak Ke-81 Tun Pehin Sri Abdul Taib Mahmud kena Hari Enam tu tadi, udah disambung baru pagi kemari enggau Pengawa Ngirup Teh begulai enggau urung 200 iku temuai nyengkaum sida ke enda bidik lansik ba sebengkah hotel tebilang ditu, kemari.
Pengawa nya mega diatur beserimbai enggau Hari Pengada Duli Yang Maha Mulia Seri Paduka Baginda Yang Dipertuan Agong ke-XV.
Sama bisi ngulu pengawa nya kemari, bini Taib, Toh Puan Datuk Patinggi Raghad Kurdi Taib, Kepala Menteri Datuk Patinggi Abang Johari Tun Openg enggau bini iya, Datin Patinggi Datuk Juma’ani Tuanku Bujang, Sapit Kepala Menteri Datuk Amar Awang Tengah Ali Hasan sereta menteri enggau menteri muda kabinet menua.
Beserimbai enggau pengawa nya mega, Tun Taib bisi nyuaka bantu wang RM150 nyengkkaum hamper berega RM100 ngagai raban ke tudah tu, ke diambi ari palan pengelantang pendiau di menua tu.
Entara Palan pengelantang pendiau ke bisi dikanggau ngulu pengawa Ngirup Teh tauka ‘High Tea’ nya, Palan Pengelantang Pendiau Pelilih Menua Kuching, Rumah Seri Kenangan Kuching, Rumah Seri Seri Kenangan Sibu, Palan Pengerai Samarahan, Rumah Anak Mit Toh Puan Hajah Norkiah Kuching, Rumah Anak Mit Datuk Ajibah Abol Sri Aman, Sekula Tunas Bakti Kuching, Taman Seri Puteri Kuching, Desa Bina Diri Kuching, Asrama Akhlak enggau Bengkel Seri Sarawak.
Ba pengawa nya mega, Tuai Pemegai Menua disempulang pemesai menua nyirap kek Hari Pengada iya, nyengkaum pemerindang bukai ke merindang semua temuai sereta pemesai.
Nangkan nya, Tun Taib ti disempulang ulih Abang Johari sereta pemesai bukai nurun meda pengawa pemandang Dirgahayu Tuan Yang di-Pertua Nengeri Sarawak ti bisi dipandangka ba Atrium Plaza Merdeka, berimbai enggau hotel nya.