Jaku enggau main asal meseti ditan awak nyadi kereban ngelai bansa
KUCHING: Pesereta Malam Beperindang enggau Main Asal Kelab Dayak Middletown enggau Serakup Ngasi Sarawak di Taman Unicentral Kota Samarahan kena Hari Enam tu tadi bisi mantaika pengawa pemerindang ti manah endar dikena ngelakuka agi main asal bansa Iban.
Malam nya dipungkal ngena adat asal minta berekat ari Petara sereta ngelaluka penatai bala temuai dikumbai ‘Biau Piring Ngagai Petara’ enggau ‘Biau Pengabang’ ari Nichol Ragai Lang enggau Nicholas Beliang.
Bala temuai nyengkaum temuai dipebasa Dato Sri Doris Sophia Brodie, ke nyadi Sekretari Politik Kepala Menteri, diperindang enggau main asal nyengkaum Gendang Pampat, tebah Sape, Ngajat Pua Kumbu, Ngajat Kumang Berhias, Ngajat Iban Kuntau sereta Ngajat Nyumpit enggau Ngajat Lesung ti dipegulai.
Tim Gendang Pampat bemainka empat tiun lalu sida tu iya nya Pekok Manok Kaki, Terambit, Pepitu enggau Petau Bindau.
Lang mega bisi meri jaku peransang ngagai bala temuai dipebasa ti dikumbai ‘Pantun Ai Ansah’ ngagai Doris sebedau iya bejaku.
Malam nya mega bisi mantaika pemerindang kontemporari lebuh live band Seruran Merindang di baruh lambang musik OCHSP enggau penyanyi Fiedarus Udin merindang di atas panggau dientudika pemerindang ari dua iku pemenang Battle of the Bands apin lama ke udah.
Ku Doris, jaku enggau main asal nyadi kereban dikena ngelai bansa.
Taja pia ku iya, Jaku Iban kediri aja enda chukup ny- adi kunchi kereban dikena ngelaika bansa Iban laban bala bukai udah ngambi jaku sereta bekenaka jaku nya nyauka tetiap hari.
Baka kes Fiedarus bansa Melayu bejaku sereta belagu ngena Jaku Iban, ngerichahka agi pengerami malam Hari Enam.
“Kerejasama antara gerempung ukai dikuasa perintah (NGO) beguna endar dalam pengawa bansa Dayak ngintu, nyaga enggau ngelakuka main asal sereta adat lama sida.
“Daya pengidup bansa Dayak di dunya bepanggai ba degree enggau intensiti pengawa ngelaku.
“Nyadi main asal kitai chukup manah sereta pemakai asal ti nyelai, kitai ulih ngena pekara tu ngelakuka dagang temuai di nengeri tu.
“Bansa Dayak mega meseti tegap ba pengawa dagang ngambika kitai ulih bediri sama tinggi enggau bansa bukai,” ku iya.
Sama bisi datai ngulu pengerami tu iya nya Chairman Begulai Ngatur Program Blixie Genek Francis enggau Ajat Sumoh enggau bala bukai.