Penembu jalai besai Pan Borneo meruan dianti enggau penyabar
KUCHING: Lebuh pemutus Kort Tinggi Kuching kena 17 Jun nyin tadi mutuska Pengawa Bepilih Mit (PRK) sitak Bepilih Kunsil Nengeri ( DUN) Pujut di Miri ti dulu diperambu enda ibuh dipejalai, bisi sekeda raban gawa media ditu ti dikaul ba pengawa bepilih nya berasai lantang.
Ukai ketegal sebarang kaul enggau agenda politik, tang lebih agi enggai ‘kiruh’ berundingka pekara pejalai lebih 800km ari ditu, nengah bukit enggau emperan ketegal deka gawa maya ‘tabin pengawa bepilih’ nyema iya diatur.
Tu ukai pekara ti enda kala tauka enda ulih digaga, semina ba penemu Zulazhar Sheblee, jurufoto sebengkah media menua tu, iya peneleba ti chukup lelak, agi asai didinga jaku Kepala Menteri Keenam Sarawak Niang Tan Sri Adenan Satem bekaul enggau tikas jalai darat ari Kuching ke Miri ti dikumbai iya ‘tau patah punggung’.
Projek jalai besai ti lantang nyambung bagi menua Kuching di pengujung barat daya Sarawak dataika timur laut di Miri ukai pekara ke baru, tang ba penemu Zulazhar, 40-an, iya udah ninga bekaul enggau pekara nya bepuluh taun pengelama.
Nitih ku iya, projek Jalai Besai Pan Borneo nya sebedau tu suah didinga enggau nama ‘Trans Borneo’.
Dalam taun 2013, perintah besai ngemai berita gaga ngagai peranak lebuh mantaika pengeran ngemansangka Pan Borneo, jalai besai sepemanjai 2,000km, nadai tol ungkup pejalai lantang agi ari ujung barat daya di Sarawak, nguing terus meling Sabah dataika Serudong di Sabah, nyadi seiti ari manifesto pengawa bepilih besai Barisan Nasional (BN).
Nyata iya ukai semaya bula pengudah Menteri Besai Datuk Seri Najib Tun Razak dalam Bajet 2015 mutuska ke alai pengawa ngaga jalai besai ti dikumbai deka nyadi ejen ubah ngagai peranak menua tu, tetap deka digaga nadai ngira sekalika gaya ekonomi dunya kemaya hari, taja rega komoditi besai menua enda tentu ke diatu.
Jalai besai nadai tol dipelaba beungkus lebih RM29 billion (RM16.49 billion ungkup jalai di Sarawak lalu RM12.86 billion di Sabah) tu patut digaga dikena meransang pengerembai ekonomi, laban peranak Sarawak enggau Sabah udah lama nganti, lalu agenda Transformasyen Nasional ( TN50) bela ngemeratka pekara ‘inklusif’ patut diangkat tinggi.
Jalai Besai Pan Borneo Sarawak dipelaba deka tembu dalam taun 2023.
Ketegal pengawa ngujungka Abdul Hadi Abdullah, 52 taun, siku kontraktor ditu, berundang ngena jalai darat antara Kuching, Miri, belebuh ngagai Limbang, suah dalam timpuh sebulan.
Iya berasai lantang laban entukar 4WD ti dikena iya sikar nempuh pejalai jauh nya, tang mega nemu sereta nerima, ni penegar entukar ti dikena, iya suah mega entudi lori besai ba tebal agi sepemanjai jalai.
Diatu iya nganti penuh pengarap, berasai lantang meda kiba-kaban jalai ti ditengah udah bisi kereja ngemesaika jalai, lipan udah nadai alah dikira ulih dipeda.
Gaya bedebu lalu belebuh lichak maya hari ujan di tisi jalai nadai ngasuh sebana laban tepedaka jalai tiga tauka empat lorong ti disemaya, benung digaga perintah.
Baka ti dipadah Kepala Menteri Sarawak Datuk Patinggi Abang Johari Tun Openg apin lama ke udah, datai lalu peda kediri empu pemansang Pan Borneo tu. Tu ukai projek nginti undi rambau pengawa bepilih aja, pemansang fizikal benung dipejalai, ukai jaku ngapa.”
Ba penemu Edward Stephen Subeng, 60-an, ti suah berundang antara Kuhcing enggau Sibu pengelama tiga taun ke udah lebuh gawa ba sektor perintah di Kuching, iya bisi tiga pilih pulai ke Sibu begulai enggau bini sereta bala anak nyangka sekali tauka dua kali dalam timpuh sebulan, sekalika ngena bilun, nepan bas tauka deriba kediri empu.
Ngena bilun, penanggul iya ba pekara belanja ti tinggi ungkup pemisi pandak, lalu nepan bas deka mar endar mindah maya di Sibu, lalu deriba kediri baka Abdul Hadi, iya nya, lama entudi belakang lori di sepemanjai jalai, ngujungka timpuh kemisi pandak, ti endang ditemu pandak.
Nyangka penerang dibantaika Menteri Kereja Raya Datuk Seri Fadillah Yusof apin lama ke udah bekaul enggau pejalai Pan Borneo deka ngasuh Abdul Hari, Edward enggau orang bukai berasai lantang agi.
Nitih ku menteri peranak asal Sarawak nya, taja tiga jalai begembar Pan Borneo diatu bisi laun ketegal sekeda penanggul ba pekara ngambi tanah, tang semilan lurung jalai ke bukai ukai semina lanchar, tang ulih tembu tumu agi ari perambu, lalu iya andal kesemua 12 lurung jalai besai deka tembu nitihka timpuh ditetap. — Bernama