Semangat patriotisme patut ditempa kenyau ari mit
Tiong: Raban apai indai enggau pengajar ngembuan tanggungpengawa ke besai dalam ngemujurka juluk tu
SIBU: Raban apai indai enggau pengajar ngembuan tanggungpengawa ke besai dalam nerenakka semangat patriotisme ba bala nembiak rebak baru.
Temuai dipebasa, Tiong Sie Kiong ti ngarikan Kaban Kunsil Nengeri ( ADUN) Dudong, Datuk Tiong Thai King, nyemetak madah, maya umur agi biak sida lebih muntang meretika sebarang pekara ti dipeda enggau dipelajar.
“Nya alai, beguna endar ngagai bala nembiak diembing memanah ngambika sida ulih mereti agi pemesai guna patriotisme,” ku iya nambah.
Iya mansutka jaku tu rambau atur program ari Opis Pemansang Mensia Mayuh ( KEMAS) Lanang diatur nyerumba Pengawa Ngintu Hari Merdeka di Lanang Camp, kemari.
Pemangku Direktor KEMAS Nengeri, Dayang Monalizawati Abang Ismail, dua iku chalun ditaga ulih menang Parti Sa’ati Rayat Sarawak (SUPP) ungkup sitak Parlimen Lanang, Kelvin Kong enggau Joseph Chieng mega bisi datai.
Ku Tiong, pengudah sida mereti agi nama reti patriotisme, sida deka ngetanka semangat patriotisme maya semua sida besai dudi hari.
Kelimpah ari nya, iya mega minta bala apai indai laban sida mega bela bejalaika pangku pengawa beguna endar ba pejalai pemansang pelajar bala anak.
“Ba pekara tu, apai indai patut gawa rat begulai enggau pengajar tadika ngambika sida nemu baka ni pemansang pelajar bala anak sida.
“Lebuh apai indai ngaul diri terus ba pemansang pelajar bala anak sida, tu deka mantu meri peransang ngagai bala anak ngemanahka agi ba sebarang pekara ti dipelajar sida ba tadika,” ku iya.
Ku Tiong nambah, lebuh sida bisi peransang belajar, tu deka mantu nempa tikas pechayaka diri ba bala nembiak.
Iya mega muji bala staf ngajar di Tadika KEMAS ti udah ransing gawa sereta kiruh ngajar enggau ngembing bala nembiak mitd di tadika.
Nya alai, beguna endar ngagai bala nembiak diembing memanah ngambika sida ulih mereti agi pemesai guna patriotisme. Tiong Sie Kiong Pengari ADUN Dudong