Jematan Katibas dikeandal ngelengkas projek jalai
Rayat ditu endang chukup ngandal sereta gagit deka meda menua sida ulih dilawa nengah jalai alun
SONG: Penembu Jematan Katibas nyadika pengandal enggau pengagit rayat ditu deka meda menua sida dilawa jalai alun.
Tuai Rumah Gelok Riti madah, udah jematan nya tembu dia menua sida mega nangkan ke tu endang digagaka jalai.
“Baka rumah panjai aku di Engkabau, penyauh ari jematan tu semina dua kil- ometer aja.
“Nya alai, aku pechaya perintah deka nembuka jalai alun kami iya ke diatu agi nengah jalai tanah,” pia ku iya madah maya berandau enggau pengarang berita.
Iya antara mensia mayuh ke bisi datai maya Sapit Kepala Menteri Tan Sri James Jemut Masing ngabas penembu projek Jematan Katibas di Song, lemai kemari.
TR Gelok mega madah, enti datai jalai ila, sida serumah panjai 40 pintu deka baka mensia mayuh ke bukai di Song ditu ti deka bulih penguntung enggau pengelantang.
Nyukung penemu iya, siku ari peranak rumah panjai iya, Nalong Rimba bela madahka pengingin ati deka digaga ka jalai endang pemansang ke patut diasaika rayat.
“Tu mih pemansang kami baka rayat di menua pesisir ditu.
“Ngarapka perintah lengkas ngaga ke kami jalai bepun ari projek Jematan Katibas diatu udah tembu,” pia ku iya.
Iya ti mega kala enggau gawa ngaga projek jematan nya sebedau tu ngasaika sida di menua nya nangkan ke tu nadai nanggul ngangkatka penatai pemisi diri kelimpah bela ngulihka pengelantang ari projek nya.
TR Ayang Sumbang ari Sungai Ayat ti nguluka sida serumah ti nyauka sampal ngulu pengawa sehari nya berasai gaga amat ati sereta meda penampak pengelantang pengidup udah tu ila.
Ku iya, sebedau tu jalai ngelawa rumah panjai sida udah bisi digaga tang projek nya ngetu dulu lalu diatu agi nengah jalai ke enda manah.
“Nya alai, kami semenua bisi enda nengah jalai ke digaga suba laban empai tembu amat lalu agi ngena chara merau.
“Baka bala bukai, kami besai amat pengarap rumah panjai kami mega bela deka digagaka jalai alun ti lebih agi meruan,” ku iya sambil madah penyauh merau ari pasar Song ngelawa rumah panjai sida iya nya urung tiga jam.
Berebak enggau tu, iya madahka diri andal perintah ulih nembuka enggau lengkas projek Jalai Kanowit-Song- Kapit.
Sapit Menteri Pemansang Menua Pesisir ( KKLW) Datuk Alexander Nanta Linggi dulu agi ari tu maya ke bejaku ba mua mensia mayuh madahka pengawa sehari nya diatur kelai Masing endang orang ti ngemeratka pemujur projek Jematan Katibas nya.
Ku iya, Masing ti mega Menteri Pemansang Infrastruktur deka meda enggau mata diri empu projek nya digaga nitihka spesifikasi projek ke ditetapka sebedau tu.
“Sehari tu kitai mai iya kitu lalu nangkan ke tu ila kitai ( KKLW) merambu deka ngangauka Menteri Besai Datuk Seri Najib Razak bejadika projek tu,” pia ku iya madah.
Ba pekara bekaul, Kaban Parlimen Kapit nya bela madahka kelimpah projek infrastruktur baka jematan nya, piak sida mega ngemeratka pemansang rayat ke bukai.
“Tu nyengkaum baka ngaga projek nengah RISDA enggau FELCRA sereta projek pemansang modal mensia ke bukai baka projek ari KEMAS, Mara, GiatMara enggau mayuh agi projek ke bukai.
“Semua ke udah digaga tu ngelai kitai di menua pesisir enda tinggal ari pemansang,” ku iya madah baru.
Ngarapka perintah lengkas ngaga ke kami jalai bepun ari projek Jematan Katibas diatu udah tembu. Nalong Rimba