Bisi 16 pintu peranak Rh Lembu, Entalun dipindah ketegah bah
KUCHING: Bisi 44 iku ari 16 pintu rumah panjai Lembu Dugau, Entalun, Skrang udah dipindah ngagai Palan Ngenduh Tasah Bah di Balai Dr Johnical Rayong Ngipa, Skim Skrang pengudah rumah panjai sida ampuh bah urung pukul 10.31 malam, kemari.
Nitih ku peranak rumah panjai nya, ujan bangat urung pukul 10 malam ngasuh tikas peninggin ai ulu Skrang ngenyit niki ngujungka rumah panjai nya ampuh.
Komandan Operasyen Kanan Bomba PBK 1 Henry Jugah ke nyadi pemesai operasyen lebuhka dirandau madah Opis Bomba enggau Penyah Penusah Betong bisi nerima kangau ngenyit urung pukul 10 malam lalu nganjung pemesai ngesah endur penusah nya.
“Piak kami terus nganjung bantu datai ari lima iku raban diketuai PBK II Tony Morni lalu bejalaika pengawa mindah sida ke tasah ngena bot bomba, perau sereta disaup entukar 4WD,” ku iya.
“Raban kami mujur mindahka sida ke tasah ngagai palan ngenduh ngaul 18 iku lelaki, indu ( 20), nembiak lelaki (tiga) enggau indu mega tiga iku, kesemua sida tu 44 iku.
“Piak kami mega mantu mindahka seiku pesakit mati tubuh sepiak, Edward Agot, 58, ngagai palan ngenduh, enda dapat angat kenyau ari sebulan ke udah, diatu udah dianjung ngagai Sepital Sri Aman nerima perubat,” ku iya.
Pia mega ku iya, bela bisi mantu mindahka sida ke tasah nyengkaum raban Polis Diraja Malaysia (PDRM), Ikatan Relawan Malaysia ( RELA), piak Opis Pengintu Pengelantang Mensia Mayuh (JKM) kelimpah raban volunteer datai ari peranak Skim Skrang.
Berebak enggau nya, pemantu khas Kaban Kunsil Nengeri (ADUN) Engkilili Dr Johnical Rayong Ngipa, Kaunsilor Nyambong Maweng enggau Nancy Rangkung nyadi sekeda ari orang ti chukup kiruh ngatur kesemua sida ke tasah bah nya.
Kaunsilor Nyambong Maweng bisi ngerandau Utusan Borneo madah kesemua sida ke tasah bah udah nerima bantu barang pemakai enggau ai irup asil ari pemeri Dr Rayong.
“Pengudah dipadah pasal penusah nya, aku nerima kangau ari YB Rayong ngambika jampat ngagihka bantu pemakai enggau ai irup ngagai semua sida,” ku iya.
Ngelansa silik, piak sida melabaka mayuh agi sida ke tasah bah deka dipindah ngagai palan ngenduh nya berindik ari gaya hari ujan lebat diatu.
“Kandang diatu, lebih lapan buah rumah panjai tepekul ari dunya luar pengudah jalai alun nyambung sida ampuh.
“Rumah panjai tu nyengkaum Rumah Jerukan, Rumah Empading, Rumah Jalil, Rumah Amon Jugat, Rumah Jangin (Kejemut), Rumah Karin ( Tabut), Rumah Christina Nyambong ( Rembai), Rumah Kumbang, Rumah Mapang dan Rumah Jelendai (Lipat), Rumah Francis Chua ( Kaung), Rumah Ensudin, Tambi enggau Archin Bugang (Tisak) kelimpah Rumah Repong enggau Raweng di Tebarong,” ku iya seraya nambah, bantu pemakai enggau ai irup deka diagih ngagai semua sida ke tasah.
Berebak enggau nya, nitih ku Nancy, pengawa berapi enggau nyediaka pemakai enggau ai irup ngagai semua sida diatur raban volunteer ti datai ari peranak Skim Skrang sereta dibantu staf JKM.
Berindik ari nya, iya mega madahka kesemua sida ke tasah meri terima kasih ngagai piak ti mantu sida angkat mindah malam kemari.
“Kesemua sida meri besai terima kasih ngagai semua sida ti bekaul mantu angkat mindah kelebih agi Dr Rayong kelimpah piak Bomba, RELA, polis, JKM sereta raban volunteer,” ku iya.