Peranak Flat Taman Dahlia dipinta numbuhka JKKK ke pemaik dudi hari
KUCHING: Peranak ke diau di Flat Taman Dahlia, Matang ditu diperansang beratika pemereti ati antara sida sereta beserakup mutarka sebarang isu ditapi peranak ke diau dia dudi hari.
Kaban Kunsil Nengeri (ADUN) Tupong Fazzrudin Abdul Rahman madah peranak ke diau dia patut bejalaika inisiatif kelebih agi blok flat ti apin numbuhka Komiti Pemansang Enggau Pengelikun Genturung Pendiau (JKKK) sida.
“Anang mayuh dalih ketegal enda dulu ngereja pengawa. Tumbuhka tim antara kita ditu peratika sebarang isu ngaul genturung pendiau tu lalu ngadaka kaul enggau Housing Development Corporation (HDC),” ku iya ngelalau.
Iya mansutka pekara tu rambau aum antara peranak ke diau di Flat Taman Dahlia enggau piak HDC di indu Opis HDC, ditu kemari.
Nitih ku Fazzrudin, isu dalam flat baka enda chukup endur paking, uras enggau penyalah (jenayah) ulih diputar nyema semua orang begempung mutarka isu nya.
“Nadai guna nyalahka HDC ba sebarang penanggul tang kitai patut dulu meretika sistem. HDC bisi atur pengawa sida empu ti dititih, lalu kitai patut meretika pekara tu.
“Aku andal amat pengudah aum tu, kaul antara peranak ke diau dia enggau HDC deka rat agi lalu sebarang isu ke bisi nyadi deka teputar,” ku iya.
Fazzrudin madahka HDC udah nyediaka orang ti nyuwa ti manah di Taman Dahlia, nirika rumah kus rendah enggau disubsidi rega RM50,000.
“Taja pia HDC bisi atur iya empu lalu ari 400 buah rumah kus rendah ari projek HDC, bisi 80 buah diperambu deka disuwa peranak ke diau di flat HDC baka Taman Dahlia lalu pemerat deka diberi ngagai orang ti nyuwa enggau rikot bayar ti manah, pengawa ngintu ti meruan di unit flat enggau bisi penau ba pekara belanja,” ku iya.
Fazzrudin mega ngansak peranak ke diau dia ke bisi ngulu aum kemari, bisi 60 ari sida ti nyuwa ngambi numbuhka tim gawa kelebih agi ngereja pengawa begulai enggau piak bekuasa bekaul ba isu baka numbuhka JKKK.
Sama bisi datai Pemesai Ketuai Eksekutif HDC Mohd Asman Ahmad.