Jalai 21 kilometer ari Temalat-Ngemah enda likun
Perintah nengeri minta perintah besai nengah KKLW ngungkupka agih dikena ngemanahka jalai nya
SONG: Perintah nengeri minta perintah besai ngungkupka agih dikena ngemanahka jalai sepanjai 21 kilometer ke suah ditengah mensia mayuh ari Temalat ngelawa Ngemah.
Sapit Kepala Menteri Tan Sri Datuk Amar James Jemut Masing madah, jalai nya enggi dua bengkah kompeni kebun sawit dandang besai enggau kompeni kayu lalu enda likun ditengah.
Iya madah, mensia mayuh nadai chara bukai kelimpah ngenchadika jalai nya aja.
“Kitai andal amat perintah nengah Opis Menteri Pemansang Menua Pesisir (KKLW) dipinta berundingka chara meri belanja ngagai dua bengkah kompeni nya ngambika ulih ngaga jalai nya manah agi sereta likun ditengah,” pia ku iya madah.
Iya mantaika jaku nya maya Pengawa Ngabas Penembu Jematan Katibas di Song ditu, tengahari tadi.
Kitai andal amat perintah nengah Opis Menteri Pemansang Menua Pesisir (KKLW) dipinta berundingka chara meri belanja ngagai dua bengkah kompeni nya ngambika ulih ngaga jalai nya manah agi sereta likun ditengah. Tan Sri Datuk Amar James Jemut Masing Sapit Kepala Menteri Sarawak
Jematan Katibas tu ke digaga bulan September 2014 lalu tembu bulan Julai taun tu ti beungkus RM71.5 juta enggau pemanjai 330 meter.
Nambahka jaku iya, Masing ti mega Menteri Pemansang Infrastruktur madah, 15 KM agi jalai nya mega empai ulih ditengah.
“Ari pemanjai nya, 9.6 KM endang nadai jalai kelimpah 5.3 KM ti agi benung dipelin.
“Kitai udah bisi agih belanja lalu kuntriktor udah bisi tang ngarapka perintah jampat meri kontrik.
“Ngarapka ulih berund- ingka jalai alternatif bukai ulih digaga dulu seraya ke nganti jalai ke endang projek tu tembu ila laban rayat endang ngandalka ngena jalai tu.”
Sama datai Sapit Menteri KKLW Datuk Alexander Nanta Linggi ti mega Kaban Parlimen (MP) Kapit, MP Ulu Rajang Datuk Wilson Ugak, MP Kanowit Datuk Aaron Ago Dagang, Kaban Kunsil Nengeri (ADUN) Katibas Datuk Ambrose Blikau, ADUN Bukit Goram Jefferson Jamit, ADUN Pelagus Wilson Nyabong enggau ADUN Machan Allan Siden Gramong.