KKKWPK deka numbuhka makmal entara ijinsi
Penumbuh makmal tu dikena mutarka penanggul kes beleman mali ke majak nyadi di Sarawak
KUCHING: Opis Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKKWPK) deka numbuhka makmal entara ijinsi perintah (Makmal inter-agencies) dikena mutarka penanggul kes beleman mali ke majak nyadi di Sarawak.
Menteri ba opis nya, Dato Sri Fatimah Abdullah madah makmal entara ijinsi nya deka betuaika Opis Pemansang Pengawa Rama ( Kaunsil Pemansang Sosial) lalu deka digulu sekeda ijinsi iya nya Polis Diraja Malaysia (PDRM), Rumah Jil, Opis Pengerai, Gerempung Ukai Dikuasa Perintah (NGO kelebih agi Orang Indu Sarawak ke Komuniti Orang Indu) Tuai-tuai pupu raban bansa, raban pengari rayat ( YB), KKKWKPK, Opis Orang Indu enggau Ruang Bilik Sarawak (JWKS) enggau Opis Pengelantang Pendiau (JKMS).
Ku iya, serak tu, Rumah Jil disengkaum laban enti sida bisi peneleba ba kes di Sibu alai siku apai orang dijil 12 taun laban masung anak iya empu, tang udah abis timpuh jil nya, apai orang nya dilepaska, tang pulai baru ngereja pengawa salah, lalu serak tu masung uchu iya empu.
Laban enti bisi pengurang ba sistem undang- undang penyalah, dia pekara nya deka diputar begulai,” ku Fatimah.
Iya madah munyi nya lebuh aum media pengudah abis aum Opis Kunsil Orang Indu enggau Diri Sebilik (MWPKS) begulai enggau ijinsi perintah sereta NGO di sebengkah hotel ditu, kemari.
Makmal entara ijinsi nya deka ngaga ‘profiling’ kes ke deka digaga Opis Kaunsil Pemansang Rama (MPSS), lalu makmal tu deka dipunka dalam minggu tu lalu dijangka tembu dalam bulan November tu.
Enti kitai deka ngurangka kes beleman mali majak nyadi, kitai enda tau enda ngambi singkang ke holistik,” ku iya.
Aum pagi kemari, beratika ari sekeda sukut ‘profiling’ orang ke ngaga penyalah nya, ari sukut kes mangsa beleman mali, dalam taun 2016, ke ngaga penyalah nya (3 iku apai orang), lalu ba taun 2017 (apai tiri 3 iku enggau apai endar 2 iku), aki orang (2016 – siku, 2017 – siku ke berumur entara 59 taun ngagai 64 taun).
Kes pemadu biak nyadi ba siku nembiak indu (kes beleman mali ke nyadi dalam taun 2016) berumur 3 taun lalu ke pengabis tuai 19 taun lalu dalam taun 2017 (umur pengabis biak 8 taun lalu ke pengabis tuai 19 taun).
Tu kes ke bisi di ripot, laban dipelabaka agi bisi kes nyadi tang enda diripot,” ku iya.
Ba pengawa ngaga ‘profiling’ ku iya, MWPKS begulai enggau OSCC ( One Stop Crisis Centre) deka ngaga ‘profile’ pengawa salah nya, ngambika ijinsi tu nemu nama penyadi ke endar, baik nya siku-siku orang nya bisi penanggul kediri, penanggul rampa baka nyangka rumah nya nadai bilik tinduk ke menyana, tusun ruang bilik nya, ruang bilik ke udah napi penanggul sarak tauka bisi utai bukai.
Nya alai, ku Fatimah, ‘profiling’ tu ila deka betuaika ketuai MPSS, Dr. Dr. Zufar Yadi Brandan Abdullah begulai enggau OSCC ke deka beratika penatai penanggul bansa tu.
Kelimpah ari nya mega, keretas penerang deka disadung ngagai mensia mayuh pasal penanggul beleman mali sereta kena pasung, ngambika mensia mayuh nemu pasal penanggul tu, lalu nemu endur ngeripot penanggul bansa tu.
Tu siti pekara ke enda tau enda diputar enggau serius sereta strategik, holistik sereta begulai enggau entara ijinsi, komuniti sereta mensia mayuh, nyengkaum atur ke dikena dalam timpuh ke pandak tauka panjai.
“Kami udah besetuju deka ngaga bengkel entara ijinsi, ngaga siti perambu ke patut digaga, ke dikemutar enggau manah ngambika bantu tu datai ngagai mensia mayuh.
“Enti kitai beratika kes ke nyadi tu, iya ukai semina nyadi di mengeri aja tang nyengkaum di menua pesisir, lalu nya kebuah ba pengawa meri penemu, pekara tu enda tau enda datai ngagai teluk pisuk menua,” ku iya.
Beratika mayuh kes bansa tu majak pansut diatu ku iya, laban mensia mayuh pechaya bisi atur ke diambi ulih polis enti sida iya nerima ripot nya, nangkap orang nya, nasat sereta ngenuku kes, lalu enti ditemu salah, orang nya deka di ukum.
“Tu jaku lalau ke berat ngagai mensia mayuh…. ukum ke diberi nya, datai ari kort ke endang ditemu berat, nyengkaum kena lunsin.
Kami pan nemu bisi kes ke enda diripot, bisi kes diripot, tang kami mega pechaya bisi kes ke enda diripot ketegal sekeda pekara, nyangka orang nya enda nemu tauka enda nemu dini alai minta saup tauka bisi ketegal bukai,” ku iya.
Iya madahka dalam aum sida iya pagi kemari, enti deka meri penemu ngagai pemayuh mensia kelebih agi, pengawa ngelatih juru latih enda tau enda digaga mantu Perintah.
“Nyangka ngelatih sida tu meri penemu, ngaga program begulai enggau MWKS sereta LPPKN (Kaunsil Perambu Pengidup Ruang Bilik Rayat Menua), lalu raban ke ditagit, iya nya bala nembiak, anak mit, nembiak sekula, indai, sekula, ngambika juru latih tu nemu enti sema sida iya nerima ripot ari nembiak, sida iya nemu mutarka penanggul nya.
“Juru latih mega nemu ngelala ulah ke berubah ba anak mit ari sukut ulah sida iya, juru latih tu ulih mantu,”ku iya.
Sama bisi enggau ngulu atur pengawa nya kemari, Direktor Opis Tasat Pengawa Salah (JSJ) Indu Opis Kuching (IPK) Dato Dev Kumar, Direktor MWPKS, Noriah Ahmad enggau ketuai MPSS, Dr. Dr. Zufar Yadi Brandan Abdullah.
Laban enti bisi pengurang ba sistem undang-undang penyalah, dia pekara nya deka diputar begulai. Dato Sri Fatimah Abdullah Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit