Pasukka silibus betanam betupi moden ba MYTV
Sarawak benung nuju pengawa betanam betupi moden ti ngemeratka teknologi baka sistem patigasi
BETONG: Sapit Kepala Menteri Datuk Amar Douglas Uggah Embas merambu ngasuh silibus betanam betupi moden dipasuk dalam Program Transformasyen Nembiak Nengah Vakasional (MYTV) maya renggat ti deka datai.
Ku iya, Sarawak diatu nyingkang ngagai pengawa betanam betupi moden ti ngemeratka pengawa bekenaka teknologi pemadu baru baka sistem nanam patigasi.
“Kitai udah berandauka pekara tu enggau Raban Soldadu Malaysia ( ATM) sereta ejensi bekaul ngambika ngemasukka silibus baru iya nya pengawa betanam betupi moden baka patagasi sereta ke bukai.
“Tu deka muka siti agi bidang baru ngambika diserungkai, tambah mega diatu Sarawak mansang ngagai pengawa betanam betupi moden,” ku iya lebuhka dirandau pengudah bejadika Pengawa Nutup Program MYTV di Padang Futsal Spaoh semak ditu, .
Nitih ku Uggah, ke mega Menteri Betanam Betupi Moden, Tanah Adat enggau Pemansang Kandang Menua, perintah nengeri seruran nyukung pengawa ngatur MYTV ti ngemeratka kandang menua pesisir laban iya seriris enggau program transformasyen menua pesisir di Sarawak.
“Kitai bisi mayuh raban
Kitai udah berandauka pekara tu enggau Raban Soldadu Malaysia (ATM) sereta ejensi bekaul ngambika ngemasukka silibus baru iya nya pengawa betanam betupi moden baka patagasi sereta ke bukai. Datuk Amar Douglas Uggah Embas Sapit Kepala Menteri Sarawak
nembiak di menua pesisir ti bisi penau nangkup peminta orang gawa landik di Sarawak nyema sida diberi latih sereta pengelandik vokasional ti setipak enggau peminta industri.
“Nya alai, latih pengelandik baka tu beguna endar laban iya mantu raban nembiak nemu sereta ngelatih sida enggau pengelandik ngambika bisi makit gawa dalam industri tauka nyadi orang dagang,” ku iya.
Ngelansa pasal MYTV, ku Uggah, iya nyadi program ti manah endar laban ulih muka runding raban nembiak menua pesisir ngambika sedar awak ke bisi di menua tu ari sukut pengelandik ngulihka penatai pemisi.
Reti iya, ku iya, raban nembiak ti nadai pengawa di menua pesisir enda patut putus pengarap laban bisi mayuh awak diserungkai, sida meseti bisi pengelandik.
“Aku bisi dipadah raban nembiak deka ngulu latih pengelandik ti dipejalai ejensi perintah nengeri enggau besai ditu kemari, pengelama dua minggu, belajar bemacham bidang baka pengawa berumah, nguntin buk enggau ke bukai.
“Pengudah latih tu, pesereta ulih milih kereja tauka nampung pelajar dalam bidang vokasional di kolej komuniti tauka sekula vokasional dikena ngenegapka pengelandik sida,” ku iya.
Ku Uggah nambah, pekara pemadu beguna iya nya program MYTV deka ngemai raban nembiak di menua pesisir ba mayuh macham pengelandik ti deka muka awak pemansut penatai pemisi, lalu tu deka ngemai sida lepas ari penyeranta sereta nyeliahka sida ari ngereja ulah enda menuku.
Latih pengelandik ti dipejalaika MYTV mega ku iya deka muka awak ngagai raban nembiak minta lisin kunteriktor kes ‘F’.
“Terima kasih ngagai ATM sereta ejensi ti bekaul ngatur MYTV. Tu seriris enggau program transformasyen menua pesisir dikena ngemunaska penyeranta sereta ngemai pengelantang ngagai peranak menua pesisir,” ku iya.
Ba lansa ke bukai, Panglima Medan Timur Soldadu Darat, Leftenan Jeneral Dato’ Wira Mohd Zaki Mokhtar madah ATM nyukung perambu Uggah sereta udah bisi dalam perambu piak sida nambahka kus ti dipejalai.
Diatu ku iya, kus pengelandik ti dipejalai dalam program MYTV belalauka peminta raban nembiak di menua nya.
“Berebak enggau nya, kitai sedar pengelandik ba pengawa betanam betupi di Sarawak bela beguna. Pejalai kus dalam bidang tu udah dikerandau lalu enggau berekat ari Tuhan, iya deka dipejalai maya program MYTV ti deka datai.
“Tu renggat ke lapan MYTV, timbal chukup manah. ATM seruran nyukung program transformasyen menua pesisir nengeri tu sereta mega nyadi tanggungpengawa rama korporat (CSR) ATM mantu sereta meri awak ngagai bala nembiak ngemanahka tikas pengidup sida nengah latih pengelandik ti diberi,” ku iya.
Sama bisi datai Kaban Kunsil Nengeri (ADUN) Saribas Mohammad Razi Sitam, Panglima Divisyen Satu Infantri Malaysia Mejar Jeneral Datuk Stephen Mundaw enggau Direktor Opis Orang Indu enggau Ruang Bilik Sarawak Noriah Ahmad.