PRU14: Sitak Parlimen Miri diining sekeda chalun bepenau
MIRI: Sitak Miri makin angat enggau pengawa bepilih besai ke-14 (PRU14) berindik ari sekeda chalun deka bediri bisi dipeda bejalai gawa di tiga penuduk Kaunsil Bepilih Nengeri ( DUN) Senadin, Pujut enggau Piasau di baruh penuduk Parlimen Miri.
Penyandang ke diatu, Ketuai Parti Keadilan Rakyat (PKR) Miri, Dr Teo Yu Keng ti ngalahka Datuk Sebastian Ting rambau Pengawa Bepilih Besai Ke- 13 ( PRU13) suba.
Sida empat tu iya nya Chairman Parti Rakyat Bersatu (UPP) Pujut Bruce Chai, Pemantu Khas Datuk Lee Kim Shin ke mega Pemesai Gawa ba Biro Sebana Mensia Mayuh Parti Sa’ati Rayat Sarawak (SUPP) Miri Eric Chin, Ketuai Nembiak SUPP Piasau Kaunsilor Aris Leong enggau Datuk Bandaraya Miri, Adam Yii.
Sida tu suah dipeda ngulu mayuh bengkah pengerami enggau program sereta aktiviti rama nyengkaum ngaul peranak Miri di genturung pendiau sida, bejalai gawa ngagai renggat pun menua kandang beberapa bulan ke udah.
Chairman UPP Pujut, Bruce Chai lebuhka dirandau madahka semua pekara nya, rebak baru peranak Miri ulih beratika gaya ekonomi enggau pemerat runding apai indai ulih idup ba pengawa digaga kitai kemaya hari nyema iya diberi awak dichalun nyadi chalun Barisan Nasional (BN) di Miri.
Ku iya, kitai patut enggau meseti mai Miri pulai baru baka taun ke udah ngagai kitai taja Miri bisi juluk nyadi mengeri dagang temuai dudi hari.
“Aku pechaya, Miri ulih nyadi hub ngatur pengawa enggau pelajar seriris enggau nyadi mengeri resort, belalauka ketetiga pekara tu, dikena ngemansangka Miri ngagai abad ke 21,” ku iya.
Nitih ku Bruce, dikena ngulihka kuasa enggau perintah besai baka ba pekara pelajar, baka ti digaga kitai, kitai meseti seruran berandau lalu ngerah pengering nentuka hak tu enda lenyau sereta dibai pulai baru ngagai nengeri tu.
Ku iya, kitai nyukung polisi perintah nengeri ti ngetanka hak Sempekat Malaysia kitai lalu juluk aku nengah pelasar parlimen mantaika peminta kitai.
Tambah mega ku iya, ngena Jaku English nyadi batang jaku kedua lalu deka seruran ngansak ngagai tikas perintah besai ngambika kitai ulih terus ngetanka sistem pelajar ungkup Sarawak.
Ku Bruce, pekara kepenudi ti deka dibai iya ba peminta sukut pengelikun rama imigresyen, aktiviti salah baka judi belalai enggau dadah di Miri, ngansak mayuh agi raban penerit adat, mayuh agi raban polis enggau polis budu ngambika pengelantang ulih diasaika peranak Miri dudi hari.
Siku da agi chalun, Ketuai Nembiak SUPP Piasau, Kaunsilor Aris Leong madah, naka ke diatu, iya udah ngabas lebih 20 bengkah tumpuk pendiau di Miri lalu nguji ngelala penanggul enggau isu ditapi ba renggat akar umbi.
Ku iya, betemu enggau rayat di pun menua nyadi pelasar pemadu manah dikena ngelala, minta buah runding enggau mutarka isu mit ti ditapi komuniti.
“Pekara ti beguna endar iya nya gawaka rayat nyadi batang pengawa sereta meseti mending enggau mutarka penanggul ditapi rayat,” ku iya madah ngagai The Borneo Post kemari.
Nitih ku Aries, iya udah gawa ba sayap nembiak SUPP ngelama tu lalu deka nyadi chalun ti ulih menang di Miri nyadi pangku pengawa berat endar laban bisi tiga DUN di baruh penuduk Parlimen.
Ku iya, penuduk Piasau, Pujut enggau Senadin bisi peranak mayuh endar lalu kitai meseti anang kelalu milih betemu enggau pengundi di renggat pun menua sereta nemu nama peminta sida lalu nama pemerat dikedeka sida.
Ku iya, baka sehari tu, iya bisi ngabas Kampung Lopeng, udah nya betemu enggau peranak di Taman Tunku, Miri, deka beratika baka ni mutarka peminta bekal ai sida ngagai piak bekuasa bekaul.
Chalun ke bukai, Eric Chin diberita bejalai gawa ngagai pun menua nyilih Kaban Kunsil Nengeri ( ADUN) Senadin Datuk Lee Kim Shin lebuh iya nadai di sitak nya ngulu program ke bukai di luar Miri.
Eric mega bisi dipeda ngabas sida ke tasah angus enggau sida ti seranta sereta pengentap pendiau, tumpuk pendiau enggau genturung pendiau ngarika Datuk Lee.
Nangkan nya, chalun bukai, Datuk Bandaraya Adam Yii ke mega kaban Kanan SUPP Miri mega bisi dipeda ngulu program enggau pengerami diatur SUPP tauka parti komponen BN ke bukai, ditu.
Iya siku datuk bandaraya ti landik bejaku sereta bisi sukung di renggat akar umbi kelebih agi ari bala kaban SUPP enggau BN di Miri ditu ketegal pemanah pengawa iya dalam parti enggau peranak ditu.
Ba lansa ke bukai, parti penyakal datai ari PKR enggau DAP agi ngelubi ngulihka penuduk Miri.
Penerang madah, Dr Teo Yu Keng enda minta diri dipilih baru tang chalun indu PKR deka disabung dia.
Berebak enggau nya, Sekretari DAP Sarawak, Alan Ling mega bisi diberita deka nyadi chalun di Parlimen Miri ngarika parti nya.
Bala pengundi di Miri deka nyagam ati diri sapa bagi chalun BN enggau penyakal ti deka ngerampas penuduk Parlimen Miri maya PRU14.