Projek nyambung paip ai ba Tudan Desaras deka berengkah minggu tu
MIRI: Projek nyambung paip bekal ai beresi ngagai lebih 400 buah rumah peranak ke diau di Tudan Desaras semak ditu, ti beungkus RM713,380, deka berengkah dipejalai minggu tu.
Pengari Opis Bekal Ai Menua Pesisir (JALB), madahka projek ti deka digaga dalam timpuh tiga bulan nya, dipelaba tembu sebedau Hari Krismas ngambika bekal ai beresi ulih disambung ngagai rumah peranak dia.
Kemari, Kaban Kunsil Nengeri ( ADUN) Piasau, Datuk Sebastian Ting udah bejadika pengawa nyerahka batang paip ti deka dikena di sepemanjai 6.6 km, ti mansa rumah sida.
“Pengudah projek nyambung batang paip tu tembu ila, deka ngemai pemaik ngagai 423 buah ruang bilik di kandang pengentap baru pendiau Tudan Desaras tu.
“Ari penyampau nya, bisi 281 buah ruang bilik datai ari sida ti dipindah ari setinggan Kampung Api-api seraya 71 ruang bilik ari Kampung Pasir sereta 71 da agi ari Kampung Merikan,” ku iya nerang.
“Piak kunteriktor nyamin projek nyambung patut tu deka tembu sebedau hari besai Krismas, nyema nadai penanggul enggau pengawa nyambung iya lanchar,” ku iya nambah.
Berindik ari nya, Sebastian minta peranak dia meri kerejasama ngambika pengawa nyambung batang paip lantang dikereja, nyengkaum ngererak stor tauka endur paking kereta di tisi jalai ngambika kereja nyambung paip ulih digaga enggau lanchar.
Ba lansa ke bukai, piak kunteriktor ngemendarka sida nirika baru endur ti direrak pengudah kereja nyambung batang paip di jalai sepemanjai 6 km nya tembu ila.
Nitih ku piak kunteriktor, sida deka gawa nyambung batang paip besai di luar aja.
Seraya pengawa nyambung paip di dalam rumah deka dipejalai piak Lembaga Air Kawasan Utara (LAKU) ila, ti menggi pengawa pengudah projek nyambung batang paip besai tembu.
Ba lansa ke sama, ku Sebastian, iya ngarika piak Perintah Nengeri minta ampun laban laun bejalaika projek nya ketegal sekeda penanggul, tang diatu udah teputar.
“Pengudah projek nyambung bekal ai beresi tu, kitai deka berengkah nyambung bekal elekterik 24 jam, dientudi enggau pengawa ngaga entali ai ngambika alir ai lanchar sereta nyeliahka ai parit tepekul sereta bah nyadi.
“Udah nya baru kitai ngemanahka jalai batu ke diatu, melakin iya. Kitai deka nirika perengka guna ditu, dipejalai berenggat, lalu pekara ti beguna endar iya nya kerejasama ari peranak ditu, nentuka pengawa pemansang ti diperambu ditu lanchar,” tandu iya.
Sama bisi nyempulang pejalai gawa ngabas taba projek kemari iya nya bala pengari ari JALB enggau LAKU sereta piak kunteriktor bekaul.