PRU14 : PRS, PDP deka beduruk ba semua penuduk
PRS andal perambu nya disukung PDP ke pemujur kededua parti ba penuduk ke udah ungkup diri
BAU: Parti Rakyat Sarawak (PRS) deka beduruk enggau Parti Demokratik Progresif (PDP) komponen Barisan Nasional (BN) ba semua penuduk enggi kededua parti nya maya Pengawa Bepilih Besai Ke-14 (PRU14) ti deka datai.
Presiden PRS, Tan Sri Datuk Amar Dr James Jemut Masing madahka PRS andal perambu nya mega deka disukung PDP ba kesemua enam penuduk parlimen ti dipenggi PRS.
“Tu reti BN kebendar. Kitai gawa ukai kediri tang patut nyaup komponen parti ti begunaka bantu,” ku iya rambau Pengerami Makai Lemai Solidariti BN diatur PRS pampang Tasik Biru di Palan Sivik Bau, malam Hari Minggu tu tadi.
Masing, ke mega Sapit Kepala Menteri madah kerejasama nyata dipeda rambau Pengawa Bepilih Nengeri Ke-11 (PRN11) ke alai PRS enggau komponen ke bukai nyaup PDP ngetanka penuduk Tasik Biru ti balat diperebut.
Iya pechayaka kerejasama tu ngujungka chalun BNPDP Dato Henry Harry Jinep menang enggau lantang, deka meruan bisi laban PDP bisi
Tu reti BN kebendar. Kitai gawa ukai kediri tang patut nyaup komponen parti ti begunaka bantu. Tan Sri Datuk Amar Dr James Jemut Masing Presiden PRS
juluk ngelepaska Mas Gading (di baruh Tasik Biru) maya PRU14 tu.
“Kitai tau ngelempaika pengandal, PDP enggau Dato Henry, ke alai PRS deka seruran nyaup kita maya pengawa bepilih ila.
“Taja pia, kitai deka minta balas. Kami udah nyaup kita ditu, kitai meseti anang ‘ ngachau’ kami ba endur bukai. Kami (PRS) bisi enam penuduk, kita nyaup kami, kitai bela nadai nyiping pangan,” ku Masing.
Ba lansa bukai, Henry ke mega kaban kunsil supreme PDP madah PRS udah bejalaika pangku pengawa beguna endar sereta nyadi kelai penyerakup BN di Tasih Biru.
Penuduk Tasik Biru dipenggi PDP, ku iya, berebak enggau nya, parti suba dikelala ngena nama Parti Demokratik Progresif Sarawak (SPDP), lebuh nya lemi ketegal bisi charut.
“PRS begulai enggau komponen ke bukai, Parti Pesaka Bumiputera Bersatu (PBB) enggau Parti Sa’ati Rayat Sarawak (SUPP), udah gawa nyadi sebagi ari gempung BN lalu tu ngasuh PDP menang di Tasik Biru,” ku iya.
Ngarika PDP, ku iya, sida ngarapka solidariti tu terus bisi maya pengawa bepilih ila nentuka BN ulih menang baru ditu.
Ketuai PRS Tasik Biru, Datuk Wilfred Rata Nissom madah kerejasama komponen BN di Tasik Biru udah dikemeran kenyau ari Henry megai pengawa nyadi ketuai BN di sitak nya.
“Pemesai renggat akar umbi komponen BN suah ngaul diri nyauka semua inisiatif aktiviti Program Transformasyen Menua Pesisir (RTP) enggau pemansang menua pesisir ti dipejalaika Dato Henry in Tasik Biru,” ku iya.
Iya mega bisi nyebut Kaban Parlimen (MP) Mas Gading Datuk Anthony Nogeh mega patut dipuji laban ngemai pemanah BN ngagai sitak parlimen nya, lalu iya nyemetak madah ke alai BN di Mas Gading udah sedia napi PRU14.
Nogeh, ke mega Sekretari Besai PDP, nadai di menua ketegal pejalai gawa ngagai menua tasik, gawaka pangku pengawa nyadi Menteri Bumai enggau Industri Betanam Betupi.
Pengerami makai lemai nya mega mantaika mua Sekretari Politik Kepala Menteri ke baru, Charles Chad Nissom being ngagai mensia mayuh.
Charles, ari PRS, madah iya sedia gawa begulai enggau Henry ba program di Tasik Biru.
Sama bisi datai malam nya, Menteri Muda Nembiak enggau Lumba sereta Ketuai Nembiak PRS Datuk Snowdan Lawan, Ketuai Indu PRS Datuk Seri Doris Sophia Brodie, Chairman Mendam PDP Peter Ong, Ketuai PDP Tasuk Biru Michael Siten, Ketuai PBB Tasik Biru John Nyigor enggau Sekretari SUPP Tasik Biru Chin Fui Nam.
Bela datai iya nya pengari PRS ADUN Samalaju Majang Renggi enggau ADUN Murum Kennedy Chukpai Ugon sereta Sekretari Politik Kepala Menteri Edwin Banta.