Penyerakup dipandangka rayat pupu bansa Kapit dipuji Jamit
KAPIT: Kaban Kunsil Nengeri ( ADUN) Bukit Goram Jefferson Jamit Unyat muji komuniti di Kapit ti seruran besaup ngereja pengawa ngayanka semangat beserakup enggau besukung sereta ngaul pangan diri ba sebarang aktiviti dalam nentuka pemujur sesebengkah pengawa nya.
“Aku chukup temegah ati meda komuniti kitai ditu seruran begulai sereta besaup ngemujurka aktiviti, ngayanka semangat beserakup sereta solidariti.
“Pemanah tanggam kaul, begulai gawa ti diayanka kitai nyadi gaya pengidup nyelai ti ditampung kitai ari aki ini kitai menya.
“Kebuah pia laban sida nemu pemesai guna begulai gawa ngintu basa sereta pengawa bebatak asur enggau pangan diri nyadika gaya pengidup kitai ti diau begulai enggau pupu bansa,” ku iya.
“Taja malam tu kitai ngintu Festival Tanglung (Kuih Bulan), hari besai bansa China, tang aku chukup temegah meda semua bansa begempuru ditu berami begulai.
“Kitai datai ari bansa Dayak Iban, Orang Ulu (Kenyah, Kayan, enggau ke bukai), China, Melayu, Melanau sereta bala bukai.
“Kitai bela ngusung pangan diri maya ngintu hari besai, berami sereta ngempit kaul enggau bala bakih.
“Pekara tu nyenggala ngayanka taja bemacham jalai pengarap enggau main asal ti dikemeran, kitai ulih bekerejasama gawaka menua dikena nyaga penyerakup, pengelikun enggau pengelantang ke bisi diasaika kitai diatu.
“Kesemua tu ngingatka kitai pemesai guna serakup enggau pangan diri nyadi tanggungpengawa peranak Malaysia bela ngintu reti merdeka ke bendar,” ku Jamit rambau ‘Program Engagement Dan Outreach Rakan Strategic’ diatur begulai Serakup China Bersatu (UCA) enggau Komuniti 1Malaysia (K1M) Pasar Kapit nyerumba Pengerami Hari Malaysia enggau Festival Tanglung di pasar nya, lemai Hari Minggu tu tadi.
Ngelansa pasal politik ku Jamit, rayat meseti nyaga pengelantang enggau peny- erakup politik di Kapit.
Ku iya, Pengawa Bepilih Besai Ke-14 (PRU14) deka datai. Endang baka selama sebedau pengawa bepilih, piak ti bisi agenda politik dipelalai deka bisi ayan laly nabur petenah nyalahka perintah.
Ke bendar, kitai di Kapit bisi tim Barisan Nasional (BN) ti chukup manah, betuaika Sapit Kepala Menteri Tan Sri Datuk Amar Dr James Jemut Masing enggau Sapit Menteri Pemansang Menua Pesisir enggau Kandang Menua Datuk Alexander Nanta Linggi, begulai enggau bala pengari rayat ke bukai nyengkaum Kaban Parlimen (MP) Ulu Rajang Datuk Wilson Ugak Kumbong, ADUN Pelagus Wilson Nyabong Ijang sereta iya empu.
“Kitai endang gawa rat begulai merambu sereta bejalaika mayuh bengkah pemansang infrastruktur enggau penyikap perengka guna pemun dikena ngemanahka tikas pengidup ditu.
“Perintah bisi nyediaka mayuh macham bantu ngagai rumah panjai, genturung pendiau enggau tumpuk pendiau, dibagi bela. Kitai mega bisi ngagihka belanja ungkup aktiviti rama ngagai mayuh bengkah serakup bansa China dikena bejalaika aktiviti pulaika pemaik kaban serakup nya.
“Tang penyakal majak nabur petenah sereta ngasut runding orang bukai. Rayat meseti bejejimat enggau ulah bala penyakal ti tau ngasuh charut.
“Nya alai, kitai meseti nulak penyakal datai kitu. Kitai udah bisi ketuai lalu kitai patut meri sukung ngagai chalun BN.
“Nanta tu chalun dipilih kitai lalu iya deka ngetanka penuduk ngambika iya ulih nampung pengawa ngatur pemansang.
“Kenyau ari iya nyadi Sapit Menteri Pemansang Menua Pesisir enggau Kandang Menua, iya udah bejalaika mayuh bengkah projek pemansang ditu. Nya kebuah kitai meseti nyukung iya nentuka pemansang seruran bisi dipejalai dalam timpuh lima taun ti deka datai,” ku Jamit nerang.
Ba lansa bukai, temuai dipebasa, Datuk Alexander Nanta Linggi, ti bejadika program nya madah iya berasai lantang meda rayat datai begulai, teladan pemadu manah ba konsep 1Malaysia.
Iya bisi ngemendarka agih belanja penyampau RM5,000 ngagai UCA, RM5000 Komu- niti 1 Malaysia Pasar Kapit, lalu bisi 11 tim nyereta pesta tanglung nya.
Antara tim nya iya nya SJK © Hock Lam, SK Methodist, SK Kampung Baru, Opis Pemadah, bala ketuai raban bansa enggau ketuai opis perintah nengeri enggau besai, UCA, Balai Dagang China, Serakup Chiang Chuan, Tao Pek Kong Hock Leong Ten Temple, Serakup Pengempu Pak Kupi enggau Restoran sereta beribu iku pesereta ke bukai.
Sekeda bala ke bisi datai Sekretari Politik Kepala Menteri Sarawak Tapah Ata enggau Maurice Giri, Pemesai pelilih Elvis Didit sereta bala bukai.
Program malam nya dirichah enggau pengawa nerbaika tanglung, bungai api, tanda singa, main asal enggau makai kuih bulan.