247 nembiak sekula ditemu positif dadah: Abdul Karim
Penyampau nya diulih asil ari pengawa meresa ai kemi dalam timpuh setaun ti dipejalaika di sekula di nengeri tu
KUCHING: Rikod Polis Diraja Malaysia (PDRM) pampang Narkotik sereta Agensi Anti Dadah Kebangsaan (AADK) dalam kandang setaun tu mandangka urung 247 nembiak sekula di nengeri tu ditemu positif dadah.
Chairman PEMADAM (Gerempung Nagang Ulah Gian Dadah Malaysia) ti mega Menteri Dagang Temuai, Seni, Adat Pesaka, Nembiak, Lumba enggau Main, Datuk Abdul Karim Rahman Hamzah madah, enti diperatika ari sukut penyampau dalam kandang setaun, bisi 247 nembiak sekula ditemu positif dadah.
“Lebuh diperesa ai kemi ba sekeda sekula, penyampau nya dirikod ari sekula di nengeri Sarawak. Ari penyampau nya, 34 iti kes di Mengeri Kuching.
“Taja pan penyampau nya enda mayuh, kami betatika penanggul nya lalu enggaika penyampau tu majak nambah,” ku Abdul Karim.
Iya madah munyi nya lebuh bejaku ba aum media pengudah nyadi chairman aum Komiti Pengatur PEMADAM Nengeri Sarawak (ti diatur setaun sekali) ti bela digulu semua chairman opis PEMADAM ari serata nengeri, nyengkaum Opis Pelajar Menua Sarawak ( JPNS), PEMADAM, AADK, Kastam Diraja Malaysia, enggau Cure and Care Rehabilitation Centre (CCRC).
Lebuh ditanya pengarang berita, bagi sekula ke udah dilawa AADK enggau Narkotik meresa ai kemi nembiak sekula, ku iya:
“Semua sekula diperesa sechara rawak, lalu lebuh kami mutarka penanggul tu di sekula, kami enggai pengawa tu kelalu nyata dipeda orang laban kitai ngaul nembiak ke agi biak, lalu deka nyaga nama manah sekula nya.
“Nadai apai indai ke deka nganjung anak sida besekula ba sekula ke nyadi sarang dadah. Nya kebuah, kami enggau madahka dini endur sekula ke dilawa kami, enda tau dipadah ngagai mensia mayuh, media tauka chara bukai,” ku iya, ke enggai nyebut penyalah kes sebedau tu (di Semenanjung Malaysia) ke alai nama sekula ke ‘ditintai chelum’ ditemu mensia mayuh ke lalu dikerembaika.
Berebak enggau nya, iya madahka trend pengawa salah gian dadah nyau berubah kenyau ari taun jemah 70-an, 80-an kelia.
“Enti kelia, dadah ke dikena tebal agi dadah ke datai ari utai ke ditanam baka Heroine, Morfin enggau kokain.
“Kemaya hari tu, gaya dadah ke diempa tauka dikena semua asal ari dadah sintetik ke digaga di makmal, tauka ba bilik mit, tauka di rumah. Muntang agi digaga, muntang agi mih dibai tama ke menua tu, lalu chara disadung ari siti endur ngagai siti endur pan muntang.
“Laban ulih dikirum ngena kurier tauka chara bukai tauka bepelasarka gaya komunikesyen kemaya hari tu ke majak manah ari sukut infrastruktur perengka guna ke moden baka jalai alun,” ku iya.
Baka dadah tu dibai tama ke dalam sekula, tentu bisi orang ke bekaul enggau nya dalam nya.
“Kekadang dalam sekula, enti bisi siku, dua ke bisi kaul enggau ejen penyadung ari luar, asal. ulih nangkap siku dua,K ke nyadi ketuai di sekula, nya mih chara dadah nya dibai tama ke dalam sekula.
“Udah nyadi tanggungpengawa kitai ngelala sereta nemu sapa ke nyadi orang tengah nya. Ba sentang tu, kami ngarapka sekula, Gerempung Apai Indai enggau Pengajar (PIBG), pengajar sereta komuniti sama-sama mantu kami,” ku iya.
Ku iya baru, enti dalam sesebuahgenturung pendiau, bala ke bisi kaul tu mih ke nyadi ‘ Kingpin’ ngadung dadah di sekula.
Di menua pesisir, sekula di menua pesisir tauka ulu sungai sama deka diperesa ADK enggau Narkotik, baka ti dipejalaika ba sekula di mengeri tu.
“Penanggul dadah enda ngira endur, enda malut sebansa aja, tauka siti pengarap aja tauka sebuah bagi menua aja.
“Diatu pan kitai beratika pengawa salah dadah udah datai ba garis entara menua Indonesia enggau kitai di Long San,” ku iya.
Ku Karim baru, sesapa ke ditemu mandangka diri ngambi taukangisap dadah chara tebuka di laman rama baka di Facebook enggau Instagram tau mega diambi atur ulih Opis Kandang Menua (PBT) baka Narkotik enggau MCMC (Malaysian Communications and Multi Media Act.
“Mandangka diri nginsap ganja (ambika chunto) lalu mandangkka diri ba Instagram (IG) tauka Facebook ( FB) tau diukum MCMC enggau Narkotik,” ku iya.
Sama bisi enggau ngulu aum media nya kemari, Ketuai Biro Orang Indu PEMADAM ti mega Menteri Muda ba Opis Kepala Menteri (Undang-undang, Kaul Perintah Menua enggau Besai, sereta Matau Projek Nengeri) Sharifah Hasidah Sayeed Aman Ghazali, Direktor JPNS, Rakayah Madon enggau Sapit Ketuai Opis Tasat Pengawa Salah Menua Sarawak (Narkotik), DSP Sekam Anoi.
Lebuh diperesa ai kemi ba sekeda sekula, penyampau nya dirikod ari sekula di nengeri Sarawak. Ari penyampau nya, 34 iti kes di Mengeri Kuching.