APM Sri Aman mantu pengajar, pengawas UPSR ke SK Ijok, SK Basi
ENGKILILI: Penusah ampuh bah ti udah nuntung sekeda kandang menua baruh di Pelilih Mit Engkilili ditu enda ngelemi pengeransing dua iku pengajar enggau lapan iku pengawas peresa ke udah diberi tanggungpengawa nyaga chalun Ujian Peperiksaan Sekolah Rendah (UPSR) di Sekula Primari (SK) Ijok enggau SK Basi, Engkilili ditu pagi tadi.
Pemesai Pengelikun Periman Bagi Menua Sri Aman Siti Huzaimah Ibrahim madah, berindik ari jalai nuju dua buah sekula nya ke udah ampuh laban bah kenyau ari pagi kemari, Raban Penyaga Penglikun Periman Malaysia ( APMM) Sri Aman udah diasuh nyaup sida ti begunaka bantu ngelawa dua buah sekula nya.
Ku Siti nandu, piak sida udah mantu staf enggau sida ti nyaga peresa iya nya nganjung sida ngena bot APMM Sri Aman berengkah ari pukul 6.57 pagi ari palan penyangkai Opis Kereja Raya (JKR) Pasar Engkilili ke nuju ngagai Palan Penyangkai Stuga.
“Bala pekereja tu udah dibai raban APM Sri Aman, iya nya trip keterubah nganjung seiku pengajar enggau lima iku pengawa peresa ke SK Ijok. Lalu trip kedua iya nya nganjung seiku pengajar begulai enggau tiga iku pengawas peresa ke SK Basi.
“Raban kami mega lalu terus nganti semua pengajar enggau pengawas peresa di dua buah sekula nya nganti sida pulai lalu mai ke Palan Penyangkai JKR Engkilili pengudah pengawa sida tembu di sekula,” ku Siti nambah.
Ku iya nambah agi, pengawa nganjung pengajar begulai enggau pengawas peresa nya berindik ari jalai ti ngelawa SK Basi enggau SK Ijok enda ulih ditengah laban ampuh bah kenyau ari malam sebedau nya.
“Raban APM Sri Aman ngena bot nengah Sungai Batang Undop ti nyadi jalai alternatif dikena sida nganjung pengajar enggau pengawas peresa UPSR ke kededua buah sekula primari nya,” ku iya madah.