Kunteriktor Dayak patut ngembuan penemu dalam mayuh bidang

Sida meseti berani ngambi risiko nerima sereta bejalaika projek ti besai

SARIKEI: Kunteriktor Dayak diansak nempa penemu dalam mayuh bidang ti bekaul dikena sida ngulihka tetiap peluang ke bisi.

Kaban Parlimen (MP) Julau Dato Joseph Salang Gandum ngelalau sida ngambika enda ngemeranka runding ‘ alibaba’ ke ngemeratka penatai pemisi sereta proses dikena nentuka pemujur pngawa ti dilangkar tang mega beratika tikas kredibiliti sida.

“Taja enda salah kitai bekunsika kunterik enggau piak bukai, tang enti ulih anang nyuaka semua kunterik nya ngagai sub-kunteriktor lalu semina ngulihka lima ngagai sepuluh peratus komisyen nundaka chara ti suah dikena dalam konsep dagang ‘AliBaba’,” ku iya nyemetak.

Nyema enda ulih diseliahka dalam sekeda pekara bsks bisi penanggul ari sukut belanja, kunteriktor ulih meri 20 tauka 30 peratus ngagai sub-kunteriktor, ku iya meri buah runding lebuh ti bejadika kus kunteriktor ti diatur Dayak Chamber of Commerce and Industry (DCCI) ba sebuah hotel ditu kilah ensana.

Ku iya nandu, entara chara dikena nyadi kunteriktor ti nyulut sereta mujur iya nya nembuka projek ti besai.

Entara 40 iku kunteriktor ti udah nyereta kus empat hari berunggu tu iya nya ke datai ari sitak Julau, Meluan, Pakan, Sarikei, Bintulu, Miri sereta Kuching.

Ku iya ngelalau, pekara ti patut dikemerat kelimpah ari nerima penatai pemisi ti betaka sereta komisyen ti mimit, nen- gah konsep dagang ‘Ali-Baba’ mega deka meri risiko ke tinggi nyema sub-kunteriktor bisi penanggul ti enda nitihka spesifikasyen tauka enda tembu nitihka timpuh ti dilangkar.

Salang ke mega Presiden DCCI, ngelalau kuntertiktor bansa Dayak berejista nyadi kaban DCCI ke batang tuju ngelindung semua orang dagang profesional Dayak ti nyaup ngaul sida enggau piak ti engkeman dalam pengawa dagang enggau industri.

Iya ngarapka sida ti udah datai nyereta kus nya ngena enggau naka ulih penemu ti udah diiri ke dikunsi pengelicha ti ngembuan mayuh peneleba ti nitihka peminta Construction Industries Board (CIDB) ti ulih nyaup sida nyadi orang dagang ke nyulut.

Salang mega meri besai terima kasih ngagai Bumiputera Agenda Steering Unit (Teraju) ke udah bebendar meri sukung ngagai DCCI ke udah meri agih belanja RM500,000 ngagai wang turu Program DCCI-INSKEN Joint Entrepreneurial Development Capacity Building ungkup taun 2016 enggau 2017 sereta ngagai Lebuhraya Borneo Utara Sdn. Bhd. (LBU) ke udah meri geran enggau penyampau ti sama ungkup DCCI ngatur program pemansang ke orang dagang.

Entara ke bisi datai iya nya Sekretari Eksekutif DCCI Terence Temenggong Jayang, Kaban Supreme Kaunsil DCCI Dr Richard Mani, Senior Geologist ari Saudi Aramco (Saudi Arabia) John Temaga, Sekretari Besai Gerempung Pekebun Sawit Dayak Alexander Isut sereta pengelicha kus Campbell Apau enggau Menijer Operasyen Emelda Gloria Sering.

Taja enda salah kitai bekunsika kunterik enggau piak bukai, tang enti ulih anang nyuaka semua kunterik nya ngagai sub-kunteriktor lalu semina ngulihka lima ngagai sepuluh peratus komisyen nundaka chara ti suah dikena dalam konsep dagang ‘Ali-Baba’. Dato Joseph Salang Gandum MP Julau