Melanja urung RM10,000 ketegal minta MyKad
Pengudah kedua kali minta nyentuk ke sehari tu Julan nadai MyKad laban dipadah bisi penerang enda betul
KUCHING: Siku indu Penan, Julan Usang, 37 taun, madahka udah melanja urung RM10,000 dalam timpuh berapa taun tu ke udah ketegal minta kad pengelala, tang nyentuk ke sehari tu lalu bedau bulih kad pengelala nya.
Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah madahka peminta iya ba MyKad nya benung ditasat.
Julan, ku iya, sigi udah bisi surat beranak dikeluarka dalam taun 2011, ke diberi nengah Program Mobile Team JPN ke ngaga kad pengelala, surat beranak ke komuniti menua pesisir, ulu sungai ke nadai kad pengelala enggau surat.
“Maya program Mobile Team JPN ti bejalaika servis nya nya, Julan udah diberi surat beranak (ari baruh kategori laun direjista) lalu dalam taun 2014. Julan bisi minta MyKad lalu nitih ku Opis Pengerejista Bansa (JPN), peminta Julan ditulak laban bisi pemadah ke diberi iya enda betul.
“Nangkan nya, Julan minta ngaga MyKad baru kena 14 Jun 2016 (pengudah peminta iya dalam 2014 di tulak lalu iya mega bisi dipinta ngasuh ngemetulka pemadah iya ke enda betul), lalu datai ke sehari kes tu benung ditasat,” ku Fatimah.
Iya madah munyi nya ba aum media pengudah nyadi chairmank aum Komiti Khas Peranak Menua Malaysia Nengah Pekara 15A, Un- dang-undang Malaysia, begulai enggau pemesai ari JPN enggau Opis Kunsil Pengawa Rama (MPS) ba opis iya di Baitulmakmur ditu, kemari.
Ku iya baru, penanggul Julan lalu bedau bulih MyKad laban pemadah ke diberi iya enda betul lalu benung ditasat diatu.
“JPN Miri udah madah ngagai iya,Julan udah bisi surat beranak ke diatu semina minta MyKad aja, tang Julan enda tau enda meri pemadah ke betul. Nya alai, naka ke diatu, peminta MyKad ke penudi endar digaga suba iya nya dalam taun 2016, tang peminta nya benung ditasat,” ku iya.
Sama bisi enggau ngulu aum media nya kemari, Menteri Muda Komuniti, Datuk Francis Harden, Sekretari Eksekutif Opis MPS, Dr. Zufar Yadi Brendan, Sapit Direktor JPN Sarawak, Amelia Lee, enggau Penulung JPN Sarawak, Siti Aishah.
Maya program Mobile Team JPN ti bejalaika servis nya nya, Julan udah diberi surat beranak (ari baruh kategori laun direjista) lalu dalam taun 2014. Julan bisi minta MyKad lalu nitih ku Opis Pengerejista Bansa (JPN), peminta Julan ditulak laban bisi pemadah ke diberi iya enda betul. Dato Sri Fatimah Abdullah Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit