Martin van Heerde deka ngatur konsert di Katedral St Thomas, 18 Sept

KUCHING: Pemain kereban muzik organ, Martin van Heerde ari Belanda deka ngatur konsert di Katedral St Thomas, Jalai McDougall kena 18 September tu.

Konsert ‘Evening of Organ and Choir Praise’ deka berengkah pukul 8 malam,ti lalu mandangka organ ke diempu Katedral, Johannus Ecclesia T-370 ke baru.

Nya disempulang enggau Koir Katedral St Andrew ari Singapura betuaika Direktor Muzik Lim Chin Kai.

Penerang berita apin lama udah, madahka raban koir nya datai ari sebuah institusyen muzik ti pemadu tuai di Singapura.

“Tetiap iku raban koir nya ngembuan pengerindu ke chukup dalam nyembah Tuhan lalu tu mih keterubah sida nemuai ke Kuching,” ku iya.

Koir Katedral St Andrew deka mantaika ‘ Handel’s Hallelujah Chorus’ enggau ‘Gloria’ ari Vivaldi begulai enggaukoir Katedral St Thomas ti diseretai van Heerde ngena organ.

Tiket berega RM10 tau dibeli ari Palan Pemadah Ke Temuai Anglikan St Thomas Katedral ba ringkat baruh Palan Paroki.

Van Heerde mega deka ngatur seminar organ ti diberi nama ‘Understanding the Stops!’ ba hari ke sama ari pukul 9.30 pagi nyentuk 12 tengah hari di Katedral St Thomas.

Yuran ngulu seminar pula RM20. Enti deka ngerejista diri tau betelefon ngagai 012-8899739 (Clara) tauka 016-8690480 (Evelyn).

Bulan baru, van Heerde disadang bisi ngatur kelas kus bemain kereban muzik organ di New South Wales, Australia.