Riot: Rohingya enda dianjung ke Sarawak

KUCHING: Kabinet udah netapka orang Rohingya ke bisi diau di Malaysia enda dianjung ke Sarawak, ukai baka ti dikerembaika nengah media rama sebedau tu.

Menteri Pengatur Pengereja Pengawa Dato Sri (Dr) Richard Riot Jaem ti mantaika isu nya ngagai kabinet madahka pekara nya udah ditetapka sapit menteri besai ba aum kabinet di Kuala Lumpur kemari.

“Ba aum kabinet sehari tu, 13 September 2017 udah meri komitmen sereta netapka orang Rohingya ke ngiga endur ngenduh di Malaysia enda dianjung ke Bau enggau Serian di Sarawak baka ti diripot ba beberapa media menua tu sebedau tu, kenyau ari isu nya dikerembaika dalam media rama.

“Pekara nya udah ditetapka Sapit Menteri Besai, YAB Datuk Seri Dr. Ahmad Zahid Hamidi,” ku iya nengah sebengkah penerang pandak bekaul pekara nya, kemari.

Berindik ari pekara nya Riot madahka isu bekaul enggau orang Rohingya ti dianjung ke nengeri tu enda betul sereta ngarapka mensia mayuh di nengeri tu enda arapka berita selebubu nya.

“Kitai minta barang sapa ke bisi nerima berita selebubu nya nengah media rama, patut ngaga ripot ngagai piak ke bekaul, ngambika pansik silik ulih dipejalaika,” ku iya.