Kes minta nyadi peranak menua deka diputar jampat
Naka ke diatu urung 195 iti kes agi nganti diputarka, lalu dikearapka nerima timbal ke manah ari KDN
KUCHING: Aum Komiti Khas Peranak Menua Malaysia Nengah Pekara 15A, Undang-undang Malaysia, ari baruh tanggung pengawa Opis Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, begulai enggau Opis Pengerijista Bansa Sarawak (JPNS) enggau Opis Kunsil Pemansang Rama ( MPSS) ngarapka nadai agi kes nembiak tauka anak di Sarawak napi penanggul nyadi peranak menua nitihka seksyen ukum nya.
Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit ( KKKWKPK), Dato Sri Fatimah Abdullah madah, naka ke diatu urung 195 iti kes agi nganti diputarka Opis Menteri Dalam Menua ( KDN), lalu dikearapka nerima timbal ke manah ari KDN.
“Kitai ngarapka urung 195 peminta ke udah dianjung minta dikemendarka, nerima timbal ke manah ari KDN. Penyampau nya udah dianjung ngagai pampang Peranak Menua (pengudah diproses JPNS) di Putrajaya, nangkan nya dianjung ngagai KDN.
“Pengabis lama nganti pan dalam kandang 9 bulan tu ila,” ku Fatimah madah ba aum media pengudah nyadi chairmanka Aum Komiti Khas Peranak Menua Malaysia Nengah Pekara 15A, Undang-undang Malaysia, ti diatur ba opis iya di Baitulmakmur ditu, kemari.
Raban keterubah ke minta nyadi peranak menua tu udah dianjung ngagai Putrajaya enggau KDN kena bulan November 2016 tu tadi, ti dipelabaka deka ditemu pemutus nya enda lama agi, pengudah semua tasat ba sida ke minta nya tembu dipejalaika.
“Ngarapka raban keterubah nerima pemutus enda lama agi, sekalika mujur tauka enda.
“Laban enti nganti kelalu lama, ninting hari majak nambah umur, majak mayuh penanggul,” ku iya seraya madahka pengabis tuai nem-
Kitai ngarapka urung 195 peminta ke udah dianjung minta dikemendarka, nerima timbal ke manah ari KDN. Penyampau nya udah dianjung ngagai pampangPeranak Menua (pengudah diproses JPNS) di Putrajaya, nangkan nya dianjung ngagai KDN. Dato Sri Fatimah Abdullah Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit
biak ke minta nyadi peranak menua tu beumur entara 1819 taun,” ku iya.
Ku iya baru, semina di Sarawak aja ke bisi numbuhka Komiti Khas Peranak Menua Malaysia Nengah Pekara 15A, Undang- undang Malaysia ti udah dikemendar Sapit Menteri Besai ke mega nyadi Menteri ke megai betanggungpengawa dalam KDN.
Enti nitihka atur proses minta nyadi peranak menua tu, enda tau enda digaga nengah JPNS, Komiti Khas nya, pampang (Peranak Menua) di Putrajaya, lalu ke penudi endar ke meri status nya ari KDN.
Peminta ke Pekara 15A tu, iya nya nyadi rayat menua tu ke berumur 21 taun ke baruh nya pekara ke berat sereta enda tau enda diputar enggau jampat laban pekara nya bekaul enggau peluang pelajar sereta bantu pengelantang pendiau ke seseiku nembiak nya, ku Fatimah.
“Enti pekara tu laun diputuska, bala nembiak tu kena tinggal pelajar laban nadai dokumen, lalu berindik ari nya lebuh umur sida manggai 18 taun, sida iya enda ulih gawa tauka nampung pelajar ,” ku iya.
Fatimah mega madah, nengah Komiti Khas tu mega ditemu sekeda kes dipansik ke tebal agi bekaul enggau pengawa nikah enda dipejalai nitihka atur, anak mit ke ada laun direjista, ngiru anak, sereta pengawa salah bebuaika anak mit.
“Nya alai, kami ngelalau semua ruang bilik ke bisi diri sebilik ke beranak, ari asil tikah ke enda nitihka atur tauka ngadaka anak luar nikah, beratika dokumen pengelala diri ke anak mit nya, laban iya ulih meri empas ngagai penuduk (peranak menua) anak nya sereta penguntung bukai baka pelajar ke diberi ngagai seseiku rayat menua tu,” ku iya.
Ku iya, dikena mutarka penanggul nyadi rayat menua tu kelebih agi kes nembiak ke berumur 21 taun ke baruh, apai indai tauka diri sebilikanang ngelalaika anak ke ada di ruang bilik nya, tang ngerijista anak mit nya nitihka undang-undang,taja pan anak mit nya ada luar nikah.
“Bala ketuai pupu bansa patut mantu majak meri penemu ngagai nembiak sida iya ba pemerat ngerijista pengada.
“Komuniti mega enda tau enda ngerijista tikah sida iya nitihka undang-undang nyengkaum lebuh sarak,” ku iya.
Kelimpah ari nya, iya madah ejensi perintah baka JPNS, Opis Pelajar Menua (JPN), Opis Orang Indu enggau Ruang Bilik Sarawak (JWKS) enggau KKKWKPK deka majak ngaga program ngiri penemu sereta advokasyen mutarka dokumen pengelala rayat nengeri Sarawak.
Sama bisi ngulu aum media nya kemari, Menteri Muda Pengelantang Pendiau Komuniti, Datuk Francis Hardin, Sekretari Eksekutif Opis Kunsil Pemansang Pengawa Rama, Dr. Zufar Yadi Brendan, Sapit Direktor JPNS, Amelia Lee, Penulung Pemesai Pengerijista JPNS, Siti Aishah.